अमेरिकेच्या नासा या अंतराळ संशोधन संस्थेचे संशोधक शौचालय युक्त स्पेससूटची निर्मिती करत आहेत. आपत्कालीन परिस्थितीत अंतराळवीर सहा दिवसांपर्यंत हा स्पेससूट परिधान करू शकतात. नासाचे ओरियन अंतराळयानात जाणारे अंतराळवीर ‘ओरियन क्रू सर्वाइवल सिस्टम्स सूट्स’चा वापर करणार आहेत.
हे यान मानवाला पृथ्वीच्या खालच्या कक्षेत घेऊन जाईल. जिथं ओरियन अंतराळयानात शौचालय असेल. पण आपत्कालीन परिस्थितीसाठी अशा वेगळ्या स्पेससूटची निर्मिती करण्यासाठी नासाचे वैज्ञानिक प्रयत्न करत होते.
कोणत्याही अडचणींशिवाय अंतराळवीरांना सहा दिवस काम करता यावं यासाठी या स्पेससूटची निर्मिती करण्यात आल्याचं नासानं म्हटलं आहे. सध्या अंतराळवीर एका विशिष्ट प्रकारच्या डायपरचा वापर करतात. परंतु दहा तासांपेक्षा जास्त वेळ त्यांना हे वापरता येत नाही. स्पेससूट काढल्यानंतर अंतराळवीर अंतराळयानातील शौचालयाचा वापर करतात.