नाना पेठेत आर्थिक वादातून मित्राला मारहाण करून त्याच्या अंगावर पेट्रोल ओतून पेटवून दिल्याची धक्कादायक घटना सोमवारी मध्यरात्री घडली. यामध्ये एक व्यक्ती गंभीर भाजली असून, त्यांच्यावर उपचार सुरू आहेत. या प्रकरणी समर्थ पोलीसांकडून गुन्हा दाखल करून तिघांना अटक करण्यात आली आहे.
रौफ सैफुद्दीन शेख (३५, रा. नाना पेठ) असे जखमी झालेल्या व्यक्तीचे नाव आहे. या प्रकरणी समर्थ पोलिसांनी खुनाचा गुन्हा दाखल करून सर्फराज रज्जाक पिंजारी (२३), अबिद गौस शेख (१९), अजहर मेहमूद बागवान (१९, तिघे रा. नाना पेठ) यांना अटक केली आहे.
शेख आणि आरोपी पिंजारी, बागवान हे नाना पेठ भागात राहायला आहेत. शेख आणि आरोपी मित्र आहेत. शेख याने आरोपींकडून काही दिवसांपूर्वी उसने पैसे घेतले होते. त्याने पैसे परत न केल्यामुळे त्यांच्यात वाद झाले होते. सोमवारी मध्यरात्री साडेबाराच्या सुमारास शेख आणि त्याचा मित्र नदीम निघाले होते. त्या वेळी आरोपींनी शेख आणि नदीमला मारहाण करण्यास सुरुवात केली. नदीमला ट्यूब फेकून मारली. त्यानंतर आरोपींनी एका दुचाकीतून बाटलीत काढले. ते पेट्रोल शेख यांच्या अंगावर ओतले. शेखच्या अंगावरील कपडे पेट्रोलमुळे भिजले. काडीपेटीने त्यांचा शर्ट पेटवून देण्यात आला. या घटनेत शेख गंभीर भाजले असून, त्यांना तत्काळ उपचारासाठी हॉस्पिटलमध्ये दाखल केले. या घटनेनंतर आरोपी पसार झाले होते. समर्थ पोलिसांनी तपास करून आरोपींना तत्काळ पकडले. या प्रकरणी सहायक निरीक्षक परवेज शिकलगार तपास करीत आहेत.