म्हशीच्या मलमूत्रावरून दोन कुटुंबांमध्ये झालेल्या हाणामारीत एकाचा मृत्यू झाला असून दुसरा व्यक्ती ब्रेन डेड झाल्याची धक्कादायक घटना समोर आली आहे. म्हशीने घरासमोर मलमूत्र विसर्जन केल्याच्या वादातून ही घटना घडली आहे.
आंध्रप्रदेशातील गुंटूर जिल्ह्यातील गुजराला मंडल येथील जंगमेश्वरापुरममध्ये रविवारी रात्री ही घटना घडली. पोलू चेन्ना रेड्डीच्या म्हशीने शेजारी राहणाऱ्या कोंगाटी नागी रेड्डीच्या घरासमोर मलमूत्र विसर्जन केलं. त्यामुळे नागी रेड्डी भयंकर चिडला आणि त्याने संतापाच्या भरात चाकूने म्हशीचे कान कापले. त्यामुळे चेन्ना रेड्डीची पत्नी सरोजिनम्मा यांनी नागी रेड्डीला त्याबाबतचा जाब विचारला. यावेळी तिच्यासोबत तिचा भाऊ येसिरेड्डी श्रीनिवास रेड्डी आणि पुल्ला रेड्डीही होते.
सरोजिनम्माने जाब विचारल्यामुळे या दोन्ही कुटुंबामध्ये शाब्दिक चकमक उडून प्रकरण हमरीतुमरीवर आले. नागी रेड्डीने मुसळीने सरोजिनम्माच्या भावांवर हल्ला चढविला. यावेळी चेन्ना रेड्डीलाही मारहाण करण्यात आली. या मारहाणीत चेन्ना रेड्डी ब्रेन डेड झाला आहे. या मारहाणीत येसिरेड्डी श्रीनिवास रेड्डीच्या डोक्यालाही जबरदस्त मार लागला आणि त्यातच त्याचा मृत्यू झाला. विशेष म्हणजे गावकऱ्यांनी नागी रेड्डीला आवरण्याचा आटोकाट प्रयत्न केला, पण त्याने कुणाचंच ऐकलं नाही. दरम्यान, स्थानिकांनी दिलेल्या माहितीनंतर पोलिसांनी घटनास्थळी धाव घेतली आणि आरोपी नागी रेड्डीला अटक केली आहे. त्यांच्याविरोधात हत्येचा गुन्हा दाखल करण्यात आला आहे.