खाऊ घेण्यासाठी दिलेले 1 0रुपयाचे नाणे चार वर्षीय बालिकेने गिळल्याने तिचा मृत्यू झाल्याची दुर्दैवी घटना चांदगिरी येथे सोमवारी घडली. शालिनी दत्तात्रेय हांडगे असे या बालिकेचे नाव आहे. शालिनीने खाऊसाठी आईकडे हट्ट धरला होता. त्यामुळे आईने तिला 1 0 रुपयाचे नाणे दिले. चिमुरड्या शालिनीने हे नाणे गिळले.
चांदगिरी येथील चार वर्षीय शालिनी हांडगे या बालिकेने खेळताना हातातील एक रुपयांचे नाणे गिळले होते. ही बाब लक्षात येताच तिला शिंदे येथील डॉ. काकड यांच्याकडे उपचारासाठी तिला दाखल केले. मात्र, त्यांनी बिटको रुग्णालयात दाखल करण्याचा सल्ला दिल्याने तिला तिच्या वडिलांनी तत्काळ पालिकेच्या बिटको रुग्णालयात दाखल केले. येथे शालिनीचा एक्स-रे काढल्यावर डॉक्टरांनी ऑपरेशनचा सल्ला दिला. मात्र, संबंधित डॉक्टर्स नसल्याने आडगाव मेडिकल कॉलेजला नेण्याचा सल्ला दिला. बिटकोच्या डॉक्टरांच्या सल्ल्यानुसार, शालिनीला तिच्या वडिलांनी मेडिकल कॉलेजला दाखल केले. तेथे डॉक्टरांनी पुन्हा एक्स-रे काढण्यास सांगितले. त्यानुसार पुन्हा एक्स-रे काढला व ऑपरेशनचा सल्ला दिला. मात्र, रात्री नऊपर्यंत ऑपरेशन केले नाही. त्यानंतर शालिनीला त्रास झाल्याने तिला आयसीयूमध्ये दाखल केले. काही वेळाने ऑपरेशन उद्या करावे लागेल, अशी माहिती संबंधित डॉक्टरांनी दिली. दरम्यान, ट्रेनी डॉक्टर वरिष्ठ डॉक्टरांशी फोनवर वारंवार संपर्क करीत असल्याचे शालिनीच्या पालकांच्या लक्षात आले. शालिनीवर पुढील उपचार का होत नाहीत, याची ते वारंवार विचारणा करीत होते. मात्र, डॉक्टरांनी चालढकल करणे सुरूच ठेवल्याने अखेरीस रात्री शालिनीने रडत रडतच मान टाकली.
शालिनीला लवकर उपचार मिळावेत म्हणून आम्ही तिला तत्काळ डॉक्टरांकडे नेले; परंतु आम्हाला सर्वांनी दुसऱ्या डॉक्टरांकडे जाण्याचा सल्ला दिला. मेडिकल कॉलेजमध्ये औषधेही आणून दिली. उपचारांसाठी शिकाऊ डॉक्टरांनी ताटकळत ठेवले. उपचारांत चालढकल झाली नसती तर आमची चिमुकली आम्हाला सोडून गेली नसती. – दत्तात्रेय हांडगे, शालिनीचे वडील