दीपिका पदूकोण, रणवीर सिंह आणि शाहिद कपूर यांचा ‘पद्मावत’ चित्रपट बॉक्स ऑफिसवर चांगलाच गल्ला जमवत आहे. मात्र ‘पद्मावत’मागचं शुक्लकाष्ठ काही संपण्याचं नाव घेत नाहीये. कारण इतर चित्रपटांप्रमाणं ‘पद्मावत’ देखील पायरसीच्या दुष्टचक्रातून सुटू शकलेला नाही.त्यामुळं ‘पद्मावत’च्या टिमनं सायबर डिजिटल क्राइम यूनिटकडं मदत मागितली आहे.
निर्मात्यांना ‘पद्मावत’च्या पायरसीची माहिती मिळताच त्यांनी अॅन्टी ऑनलाइन पायरसी यूनिट आणि महाराष्ट्र सरकारकडून मदत मागितली आहे. चार महिन्यांपूर्वीच महाराष्ट्र सायबर डिजिटल विभाग सुरू झाला असून सिनेसृष्टीतील मोशन पिक्चर्स असोसिएशन ऑफ इंडिया आणि संगीत क्षेत्रातील काही कंपन्यांसोबत काम करत आहे.
मिळालेल्या माहितीनुसार ज्या संकेतस्थळांवर पद्मावत डाऊनलोड करण्यासाठी उपलब्ध आहे त्या संकेतस्थळांवर बंदी घालण्याची तयारी सुरू आहे. तसे पाहता आजकाल पायरसीचा स्पर्श न झालेला चित्रपट शोधून सुद्धा सापडणार नाही, कोणताही नवा चित्रपट आला की लोक आधी हा प्रश्न विचारतात की अरे नेटवर आला का? आणि आता तर चित्रपट प्रदर्शित होण्या आधीच इंटरनेटवर लिक होत आहेत.