बिहारच्या अपह्रत मुलीचा दोन महिन्यानंतर शोध लागला असून ठाणे गुन्हे शाखा युनिट एकने दिव्यातून या मुलीची सुटका करत आरोपीला अटक केली. मुलगी आणि आरोपी या दोघांनाही बिहार पोलिसांच्या ताब्यात देण्यात आले आहे.
पीडित १६ वर्षांची मुलगी बिहारच्या मधुबनी जिल्ह्यातील असून तिचे गेल्या वर्षी ३ डिसेंबर रोजी आरोपी सिकंदर महेंद्र दास याने अपहरण केले होते. याबाबत बेनीपट्टी पोलिस ठाण्यात गुन्हाही दाखल करण्यात आला होता. स्थानिक पोलिसांकडून आरोपीचा शोध सुरू होता. मात्र आरोपी ठाणे परिसरात असल्याची माहिती बिहार पोलिसांना मिळाली होती. त्यामुळे बिहार पोलिसांनी ठाण्यात धाव घेतली. या मुलीला दिव्यातील बेतवडे गावात लपवून ठेवले असल्याचे समजल्यानंतर ठाणे गुन्हे शाखा युनिट एकचे वरिष्ठ पोलिस निरीक्षक नितीन ठाकरे यांच्या पथकाने बेतवडे गावात सापळा लावून मुलीची सुटका केली. तसेच आरोपीला अटक केली.