‘आई, बाबा, डोईफोडे दादा माझ्या मुलांना सांभाळा’. ‘आय लव्ह यू पिलांनो’,गाढवे यांच्याकडून पैशासाठी छळ होत असल्याने मी आत्महत्या करीत आहे’,अशा आशयाची चिठ्ठी लिहून सारिका प्रदीप धुमाळ (३८ रा. अनुराधा अपार्टमेंट,स्वावलंबीनगर) यांनी विष प्राशन करून आत्महत्या केली. याप्रकरणी प्रतापनगर पोलिसांनी तूर्त आकस्मिक मृत्यूची नोंद करून तपास सुरू केला आहे.
सारिका यांच्या पतीचे दीड वर्षांपूर्वी अपघातात निधन झाले. त्या मुलगा व मुलीसह भाड्याने राहात होत्या. निधनापूर्वी प्रदीप यांनी त्रिभुवननाथ गाढवे यांच्याकडून सहा महिन्यांसाठी पाचटक्के व्याजदराने चार लाख ५० हजार रुपये घेतले होते. यामोबदल्यात गाढवे यांनी कोऱ्या स्टॅम्पपेपरवर स्वाक्षरी घेतली होती. तसेच दहा लाख रुपयांचा धनादेशही घेतला होता. याचदरम्यान प्रदीप यांचे निधन झाले. त्यानंतर काही दिवसांनी गाढवे व त्यांच्या नातेवाइकांनी पैशासाठी सारिका यांचा छळ सुरू केला. सारिका यांनी गाढवे यांना तीन लाख ४० हजार रुपये परत दिले. उर्वरित रक्कम परत देण्यासाठी सारिका यांनी गाढवे यांना वेळ मागितला. याचदरम्यान नोकरीचे आमिष दाखवून सारिका यांनी दहा लाख रुपये घेतल्याची खोटी तक्रार गाढवे यांनी प्रतापनगर पोलिसांत दिली. पोलिसांनी चौकशीसाठी सारिका यांना पोलिस स्टेशनमध्ये बोलाविले. त्याचा जबर धक्का सारिका यांना बसला. त्या घरी गेल्या. चिठ्ठी लिहून विष प्राशन केले. मंगळवारी उपचारादरम्यान त्यांचा मृत्यू झाला. सारिका यांच्या मृत्यूप्रकरणी आकस्मिक मृत्यूची नोंद करण्यात आली आहे. त्यांनी मृत्यूपूर्वी लिहिलेली चिठ्ठी जप्त करण्यात आली आहे.