स्त्रीहट्टांपुढे भलेभले हरले आहेत… तिथे या गाझियाबादच्या पुरुषाचा टिकाव कसा बरे लागावा!! पत्नीने हट्टही असा केला, की कोणाच्याही पोटात गोळा यावा. ‘मला किनई ‘पद्मावत’ पाहायचा आहे म्हणजे पाहायचा आहेच. तोही फर्स्ट डे, फर्स्ट शो!,’ अशी बायकोची विनवणी ऐकून पतीला घाम फुटला. त्याने तडक पोलीस स्टेशन गाठले आणि पोलिसांकडे सुरक्षेची हमी मागितली. पोलिसांनीही त्याला सुरक्षेची हमी दिली आहे.
‘पद्मावत’ सिनेमा २५ जानेवारीला प्रदर्शित होत आहे. सिनेमाच्या विरोधात करणी सेना दंड थोपटून उभी आहे. सिनेमा प्रदर्शित करण्याला राजपूत समाजाची संघटना असलेल्या करणी सेनेचा विरोध आहे. सिनेमा प्रदर्शित झाल्यास सिनेमागृहाचीच तोडफोड करण्याचा प्रयत्न करणी सेना करणार हे उघड आहे. परिणामी हा सिनेमा पाहायचा म्हणजे या तोडफोडीला सामोरं जायचं हे वेगळं सांगायला नको.
गाझियाबादमध्ये राहणारे संदीप सिंह यांनी सोमवारी रात्री टि्वट करून आपल्या पत्नीची इच्छा सांगितली आणि गाझियाबादच्या पोलिसांना आवाहन केले. चक्क गाझियाबाद पोलिसांनीही संदीपच्या टि्वटला उत्तर दिलं आहे. ‘तुम्ही निश्चिंत होऊन सिनेमा पाहायला जा. गाझियाबाद पोलीस तुम्हाला सुरक्षा पुरवेल,’ असं पोलिसांनी म्हटलं आहे.