सारसबागेजवळील फुटपाथवरून जाताना निवृत्त प्राचार्यावर मित्रानेच अॅसिड हल्ला केल्याचा प्रकार शनिवारी दुपारी घडला. यामध्ये प्राचार्य गंभीर जखमी असून त्यांच्यावर खासगी रुग्णालायत उपचार सुरू आहे. हल्ला करणारी व्यक्ती फरार झाली असून तिचा पोलीस शोध घेत आहेत. हल्ल्यामागील कारण स्पष्ट झालेले नाही. याप्रकरणी स्वारगेट पोलीस ठाण्यात गुन्हा दाखल करण्याचे काम सुरू आहे.
भारत खंडू सांबळे (वय ६०, रा. अवधूत अर्केट, सनसिटी) असे जखमीचे नाव आहे. याप्रकरणी त्यांचा मित्र मनोज चव्हाण (वय ४५) याच्यावर गुन्हा दाखल करण्याचे काम सुरू आहे. सांबळे यांना चेहऱ्यावर, गळा, मान आणि छातीवर भाजले आहे. पोलिसांनी दिलेल्या माहितीनुसार, सांबळे व चव्हाण अनेक वर्षापासून मित्र असून त्यांचे कौटुंबिक संबंध देखील आहेत. सोमवारी दुपारी सांबळे हे सारसबाग समोरील फुटपाथ येथून जात होते. त्यावेळी आरोपी चव्हाणदेखील आला. त्याने सांबळे यांच्यावर अॅसिड फेकले. यामध्ये सांबळे यांच्या चेहरा, मान आणि गळ्यावर अॅसिड पडल्याने भाजले आहे. हल्ल्यानंतर चव्हाण घटनास्थळावरून पसार झाला. नागरिकांनी तत्काळ सांबळे यांना एका खासगी रुग्णालयात दाखल केले. हॉस्पिटल येथून स्वारगेट पोलिसांना घटनेची माहिती देण्यात आली. त्यानुसार स्वारगेट पोलिस ठाण्याच्या पोलिसांनी घटनास्थळी धाव घेऊन माहिती घेतली.
सांबळे यांना भाजल्यामुळे ते बोलण्याच्या मनस्थितीमध्ये नाहीत. सांबळे हे खडकी येथील रेल्वे शाळेत प्राचार्य होते. सहा महिन्यांपूर्वीच ते निवृत्त झाले आहेत. तर, आरोपी चव्हाण हा टिळक रोड क्षेत्रिय कार्यालयात लिपीक म्हणून काम करतो. हल्ला केल्यानंतर चव्हाण पसार झाला आहे. त्याने का हल्ला केला याची माहिती पोलिसांना अद्याप मिळू शकलेली नाही. याप्रकरणी सहायक पोलीस निरीक्षक पी. आर. मोरे हे अधिक तपास करत आहेत.