‘पुरुष’ नाटकातला गुलाबराव असो किंवा ‘हमिदाबाईची कोठी’मधला सत्तार, नाना पाटेकरांनी जी जी भूमिका साकारली, ती अजरामर झाली. परंतु, बॉलिवूडमध्ये स्थिरावल्यानंतर मात्र नाना नाटकापासून दुरावले होते. १९९५ साली ‘पुरुष’ नाटकाचा शेवटचा प्रयोग केल्यानंतर आता तब्बल २० वर्षांनी नाना पाटेकर पुन्हा एकदा रंगभूमीवर काम करण्यासाठी सज्ज आहेत.
एका नव्या नाटकाद्वारे ते व्यावसायिक रंगभूमीवर अभिनेता म्हणून येणार आहेत. हे नाटक सौम्य जोशी यांनी लिहिले आहे. या नाटकात तीन पुरुष व्यक्तिरेखा असून त्यातली महत्त्वाची भूमिका नाना पाटेकर साकारणार आहेत. मराठी प्रेक्षक या नाटकाचे स्वागत करतील, असा विश्वास निर्मात्यांना आहे. राजन ताम्हाणे या नाटकाचे दिग्दर्शन करणार असून भद्रकाली प्रॉडक्शन्स नाटकाची निर्मिती करणार आहेत. २० वर्षांच्या दीर्घ कालावधीनंतरच्या त्यांच्या या एन्ट्रीमुळे मराठी प्रेक्षकांमध्ये उत्सुकता आहे.
तीन पुरुष व्यक्तिरेखा असलेले हे नाटक वाचले तेव्हा आमच्या समोर पहिलेच नाव नाना पाटेकर यांचे आले. संहिता वाचल्यानंतर नानांनी होकार कळवला. त्यांच्या तारखा आणि वेळ सांभाळून आम्ही तालीम करणार आहोत. या वर्षाअखेरीपर्यंत नाटक रंगभूमीवर येईल. -प्रसाद कांबळी, निर्माता