लोअर परळ येथे कमला मिल कम्पाऊंडमध्ये लागलेल्या आगीप्रकरणी ‘वन अबव्ह’ पबच्या दोन मॅनेजर्सना आज पोलिसांनी अटक केली. केविन बावा आणि लिस्बन लोपेज अशी या दोन्ही मॅनेजर्सची नावे आहेत. या दोघांवर निष्काळजीपणाचा आरोप ठेवण्यात आल्याचं सूत्रांनी सांगितलं.
कमला मिल कम्पाउंडमधील ‘वन अबव्ह’ रेस्टोपबला लागलेल्या आगीप्रकरणी गुन्हा दाखल करण्यात आलेले तिन्ही संचालक अद्याप हाती लागलेले नाहीत. त्यामुळे काल पोलिसांनी हितेश संघवी आणि जिगर संघवी या दोन्ही संचालकांच्या जवळच्या नातेवाईकांकडे चौकशी केली असता, त्यांनी पोलिसांना उडवाउडवीची उत्तरे दिली होती. त्यामुळे भायखळा पोलिसांनी संघवी यांच्या तिन्ही चुलत्यांविरोधात रविवारी गुन्हा दाखल केला. त्यापैकी दोघांना जामीन मिळाला आहे.
‘वन अबव्ह’चे संचालक असणाऱ्या संघवी बंधूंसह अभिजीत मानकर आणि अन्य व्यक्तींचा शोध घेण्यासाठी पोलिसांनी विविध ठिकाणी तपास सुरू केला आहे. दोन दिवसानंतरही त्यांचा मागमूस लागलेला नाही. त्यामुळे पोलिसांनी आज वन अबव्हच्या दोन्ही मॅनेजर्सला अटक केली आहे. या मॅनेजर्सच्या चौकशीतून आरोपींचा ठावठिकाणा लागण्याची शक्यता वर्तविण्यात येत आहे. या दोघांना आज न्यायालयात हजर करण्यात येणार आहे. पब चालविण्याची जबाबदारी या दोन्ही मॅनेजर्सकडे होती. पालिका आणि अग्निशमन दलाची परवानगी नसताना या पबमध्ये बदल करण्यात आले होते. या दोन्ही मॅनेजर्सच्या नेतृत्वाखाली हे बदल करण्यात आले होते. त्यामुळे या दोघांना ताब्यात घेण्यात आल्याचं सूत्रांनी सांगितलं.