मराठी माणसांच्या मनात गेली २६ वर्षे घर करून असलेला ‘मराठी पाऊल पडते पुढे’ हा लोकसंस्कृतीचा मराठमोळा आविष्कार २८ डिसेंबर रोजी आपला साडेतीन हजारावा विक्रमी प्रयोग मोठ्या दिमाखात साकारण्यासाठी सज्ज झाला आहे. परळच्या दामोदर नाट्यगृहात हा विक्रमी प्रयोग होणार आहे.
‘कलारंजना मुंबई’चे प्रमुख आणि ‘मराठी पाऊल पडते पुढे’चे निर्माता-दिग्दर्शक उदय साटम यांनी आपल्या संगीतमय संघर्षाची आणि कर्तव्याची गाथा यानिमित्ताने मांडली. मराठी संस्कृतीचा वारसा भारताच्या कानाकोपऱ्यात पोहोचविण्यासाठी ‘मराठी पाऊल पडते पुढे’ची संकल्पना समोर आल्याचे साटम यांनी सांगितले.
गेल्या २६ वर्षांत महाराष्ट्रातच नव्हे तर गोवा, गुजरात, मध्य प्रदेश, कर्नाटक, दिल्ली आणि हिमाचल प्रदेशात या कलाविष्काराचे प्रयोग झाले. फक्त गोव्यातच या कार्यक्रमाचे १६५ प्रयोग करून एक नवा विक्रम प्रस्थापित केला. ‘मराठी पाऊल पडते पुढे’ने मराठी माणसांची आवडनिवड लक्षात ठेवत काळानुसार आपल्या कार्यक्रमात बदल करीत आपले रसिकांसोबतचे नाते आणखी घट्ट केले.