विमान, रेल्वेमध्ये नवजात अर्भकांनी जन्म घेतल्याच्या अनेक कहाण्या आतापर्यंत आल्या असतील. पण मुंबई पोलिसांच्या इतिहासात कदाचित पहिल्यांदाच पोलिस व्हॅनमध्ये नवजात अर्भकाचे टँहॅ ऐकू आले असावे!
खेतवाडीतील एक निराधार महिला आजारी असल्याचा कॉल आल्यावर तिथे मदतीला गेल्यावर गरोदर असणाऱ्या महिलेस तातडीची मदत असल्याचे पोलिसांच्या लक्षात आले. डी. बी. मार्ग पोलिसांच्या व्हॅनमध्ये महिला शिपायासह अन्य दोघा शिपायांनी प्रसंगावधान राखत तिला हॉस्पिटलमध्ये नेण्याचा निर्णय घेतला. नायर रुग्णालयाकडे व्हॅनमधून जात असतानाच अनिता शेख (३५) यांनी बाळास जन्म दिला. त्यानंतरही पोलिसांनी तिला प्राथमिक वैद्यकीय मदत देऊन रुग्णालयात दाखल केले.
ग्रँट रोड परिसरातील खेतवाडी बॅक मार्गावरील कामा अग्यारीजवळ एक महिला आजारी असून तिला तात्काळ मदतीची गरज असल्याचा मुख्य नियंत्रण कक्षातून एक कॉल डी. बी. मार्ग पोलिस ठाण्यात दुपारी चारच्या सुमारास आला. तेव्हा महिला पोलिस शिपाई कोठुळे, नांगरे, व्हॅन चालक शिंगटे यांनी तिथे धाव घेतली. तिथे अनिता शेख ही महिला नऊ महिन्यांची गरोदर असून तिला तातडीने रुग्णालयात दाखल करण्याची गरज असल्याचे लक्षात आले. ही गाडी नायर रुग्णालयाच्या दिशेने जात असतानाच अनिताला प्रसूतीकळा सुरू झाल्या. काही वेळातच तिने बाळास जन्म दिला. आणीबाणीचा प्रसंग ओळखून कोठुळे यांनी जवळच्या मेडिकल स्टोअरमध्ये जाऊन कापूस, कपडे घेतले. या कपड्यात बालकास लपेटून त्यांनी तडक नायर रुग्णालय गाठले. तिथल्या कर्मचाऱ्यांनी लगेचच शेख हिला रुग्णालयात दाखल करून वैद्यकीय मदत पुरविली. केल्याने अनिता आणि नवजात अर्भक सुखरुप आहेत.