बायकोला आयफोन गिफ्ट देणं गुरूग्राममधील एका व्यक्तीला चांगलचं महागात पडलं आहे. कारण डिलिव्हरी बॉयकडून पार्लस घेतलेलं मोबाईलचं बॉक्स उघडल्यानंतर त्यांना ते दिसलं ते धक्कादायक होतं. बॉक्समध्ये आयफोनचा चार्जर, हेड फोन्स आणि इतर अॅक्सेसरीज होत्या. पण फोनच्या जागी मात्र साबणाची वडी होती. या प्रकार लक्षात आल्यानंतर त्यांनी तत्काळ त्या डिलिव्हरी बॉयला गाठलं आणि पोलिसांमध्ये तक्रार दाखल केली. यानंतर कंपनीनं त्यांना मोबाईलचे सर्व पैसे परत केले आहेत.
प्रिस्टेन एस्टेट सोसायटीत राहणारे राजीव जुल्का यांनी आपल्या पत्नीला गिफ्ट देण्यासाठी २४ नोव्हेंबर रोजी अॅमेझॉनवरून ४४,९०० रूपये किंमतीचा आयफोन-७ आर्डर केला होता. आर्डर करतानाच त्यांनी ऑनलाइन पेमेंट देखील केलं होतं. नवऱ्यानं आयफोन दिल्याचा हा आनंद जास्त काळ टिकू शकला नाही. कारण प्रत्यक्षात मात्र मोबाईलच्या जागी साबण मिळाल्यामुळं जुल्का दांम्पत्याला धक्का बसला अन् आपली फसवणू झाल्याचं लक्षात आलं.
पोलिसांनी मोबाईलची डिलिव्हरी करणाऱ्या मुलाची चौकशी तर केली अन् अॅमेझॉनच्या अधिकाऱ्यांना देखील बोलावलं. कंपनीनं राजीव जुल्का यांचे सर्व पैसे परत केल्यानंतर आपली तक्रार मागे घेतल्याचं पोलिस निरीक्षक अरविंद कुमार यांनी सांगितलं.