नाफेडच्या सहकार्याने राज्य सरकारने बाजार हस्तक्षेप योजनेतून खरेदी केलेल्या तुरीची भरडाई करून स्वस्त धान्य दुकानांत शिधापत्रिकेवर तूर डाळीची विक्री करण्यास मंत्रिमंडळ बैठकीत मंजुरी देण्यात आली. त्यामुळे आता स्वस्त धान्य दुकानांत ५५ रु. प्रतिकिलोने तूर डाळ उपलब्ध होणार आहे.
राज्यात २०१६-१७ च्या हंगामात तुरीचे मोठ्या प्रमाणात उत्पादन झाले होते. त्यामुळे शेतकऱ्यांचे नुकसान होऊ नये यासाठी राज्य आणि केंद्र सरकारने वेगवेगळ्या योजनांतर्गत तुरीची हमीभावाने खरेदी केली होती. राज्य सरकारने स्वतःच्या निधीतून बाजार हस्तक्षेप योजनेंतर्गत २५ लाख २५ हजार क्विंटल तूर खरेदी केली आहे. या तुरीच्या भरडाईस राज्य सरकारने परवानगी दिली होती. ही भरडाई केलेली तूर डाळ स्वस्त धान्य दुकानांच्या माध्यमातून रास्त भावात विक्रीसाठी काढण्यास राज्य मंत्रिमंडाळाने मान्यता दिली. त्यानुसार ही तूरडाळ आता प्रतिकिलो ५५ रूपये दराने शिधापत्रिकाधारकास मिळणार आहे.