सध्या भलेही पेट्रोलचा दर प्रतिलीटर ८० रुपयांच्या आसपास आहे; मात्र नजीकच्या भविष्यात ते केवळ ३० रुपये किंवा त्यापेक्षा कमी दरात उपलब्ध होण्याची शक्यता आहे. नवीन तंत्रज्ञान आणि अपारंपरिक ऊर्जा साधनांच्या विकसनामुळे पेट्रोलवरील इंधनासाठी अवलंबून राहणे कमी होईल. त्यामुळे पेट्रोलच्या मागणीत घट होऊन परिणामी किंमतही घसरेल. अमेरिकेतील उद्योगपती आणि भविष्यवेत्ते टोनी सेबा यांनी हा दावा केला आहे.
टोनी यांनी काही वर्षांपूर्वी जगभरात सौरउर्जेच्या मागणीत आणि निर्मितीत वाढ होण्याची भविष्यवाणी केली होती. ही भविष्यवाणी काही प्रमाणात का होईना आज खरी ठरली आहे. ज्यावेळी टोनी यांनी दावा केला होता, त्या वेळी सौरउर्जेवरील उपकरणांची आणि निर्माण होणाऱ्या उर्जेच्या किंमती आजच्या दहापट होत्या. सिलिकॉन व्हॅलीमध्ये उद्योजक म्हणून कार्यरत असणारे सेबा उद्योजकता आणि पर्यावरणपूरक उर्जेचे प्रचारक आहेत. सौरउर्जेबाबत त्यांनी केलेली भविष्यवाणी खरी ठरल्याने आता पेट्रोलच्या दराकडे लक्ष लागले आहे. पेट्रोलचे दर इतक्या मोठ्या प्रमाणात घसरण अशक्य कोटीची बाब वाटत असली, तरी टोनी यांनी सादर केलेल्या आकडेवारीवरून त्यात तथ्य वाटत असल्याचे अनेकांनी मान्य केले आहे. टोनी यांच्या मते सेल्फ ड्राइव्ह कारच्या वाढत्या मागणीमुळे पेट्रोलच्या दरांत मोठी घट होण्याची शक्यता असून, पेट्रोलच्या किमती प्रति बॅरल २५पर्यंत घसरतील.
एका खासगी वृत्तवाहिनीशी बोलताना टोनी म्हणाले की,‘’ तेलाची किंमत घसरल्याने जगभरातील पेट्रोलवरील कारचा वापर करणे लगेच बंद होणार नाही. मात्र, अर्थव्यवस्थेत इलेक्ट्रिक कारची टक्केवारी वाढल्याने या वाहनांचा टक्का वाढण्यास मदत होईल. ही इलेक्ट्रिक वाहने चालविण्यास आणि हाताळण्यास सोपी असल्याने त्यांच्या वापरात सहज वाढ होईल, असेही टोनी म्हणाले.