जिल्हा पोलिस अधीक्षकांच्या बंगल्यावर रियर गार्ड संरक्षण ड्युटीवर असताना पोलिस कर्मचाऱ्याने बंगल्यातील झाडाचे चिकु तोडले, असे पोलिस अधीक्षकांच्या निदर्शनास आल्याने संबंध‌ित कर्मचाऱ्यास कारणे दाखवा नोटीस बजावण्यात आली आहे. मनोज त्यागी (बक्कल नंबर ८५८), असे या कर्मचाऱ्याचे नाव आहे.
पोलिस मुख्यालयात सेवेत असलेले मनोज त्यागी हे ९ मे रोजी जिल्हा पोलिस अधीक्षकांच्या बंगल्यावर ड्युटीला होते. त्यावेळी त्यागी यांनी बंगल्यातील झाडाचे चिकू तोडून नेल्याचे पोलिस अधीक्षकांच्या निदर्शनास आले. त्यागी यांनी आपल्या नोकरीदरम्यान बेजाबदारपणा व निष्काळजीपणा केला असून त्यांनी याबाबत तत्काळ लेखी स्पष्टीकरण द्यावे, अशी ‘कारणे दाखवा’ नोटीस त्यांना पोलिस मुख्यालयातर्फे बजावण्यात आली आहे. तत्काळ स्पष्टीकरण न दिल्यास याबाबतचा कसुरी अहवाल वरिष्ठांना सादर करण्यात येईल, असा इशाराही नोटीसमध्ये देण्यात आला आहे. दरम्यान ही ‘शो कॉज’ नोटीस व्हॉट्‍सअॅपवर व्हायरल झाली आहे.