‘एकीचं बळ’ काय असतं याची प्रचिती हरियाणातील सिरसा जिल्ह्यातील ११ गावांतील गावकऱ्यांच्या आश्चर्यचकित करणाऱ्या कामगिरीने आली आहे. अनेक वर्षांच्या मागणीकडे सरकार, नेते आणि सरकारी अधिकाऱ्यांनी दुर्लक्ष केल्यानंतर खचून न जाता जिद्दीने पेटून उठलेल्या गावकऱ्यांनी एक कोटीची वर्गणी गोळा करून येथील घग्गर नदीवर पूल बांधला आहे.
घग्गर नदीवर पूल उभारण्यात यावा, अशी मागणी येथील गावकऱ्यांची होती. अनेक वर्षांपासून पाठपुरावा करूनही या मागणीकडे सत्ताधारी, सरकारी अधिकारी आणि नेत्यांनी दुर्लक्ष केले. अखेर पूल आपणच उभारायचा असा ‘पण’ या गावकऱ्यांनी केला. इतका मोठा पूल बांधणे खर्चाच्या दृष्टीने अशक्यप्राय गोष्ट होती. हे माहित असूनही त्यांनी हा ‘पण’ प्रत्यक्षात आणायचा, अशी मनोमन खूणगाठ बांधली. त्या दिशेने काम सुरू झाले. बघता-बघता थोडीथोडकी नव्हे, १ कोटींची वर्गणी गोळा झाली. या वर्गणीतून तब्बल २५० फूट लांबीचा आणि १४ फुट रुंदीचा पूल बांधण्यात आला. अलिका आणि पनिहारी या गावांना जोडणाऱ्या या पूलाचे बांधकाम एप्रिल २०१४ मध्ये हाती घेण्यात आले होते. ते आता पूर्णत्त्वाच्या मार्गावर आहे.
पूलाचे उद्घाटनाला गावातील राजकीय नेते आणि सरकारी अधिकाऱ्यांना बोलावण्यात येणार नाही. देवी लाल ते मनोहर लाल खट्टर यांच्यापासून अनेक नेत्यांकडे आम्ही पूल बांधण्याची विनंती केली होती. सिरसा येथील खासदार चरणजित सिंह आणि माजी मंत्री गोपाल काडा यांचा अपवाद वगळता कुणीही आम्हाला मदत केली नाही, असे पनिहारी गावचे ग्रामस्थ हरदेव सिंह यांनी सांगितले.
राजस्थानला जाताना हनुमानगड येथे एका अभियंत्याची भेट झाली. त्याच्यासोबत चर्चा केल्यानंतर पूल उभारण्यासाठी किती खर्च लागेल, याची माहिती त्याने दिली. त्यानंतर पूलाचे स्वप्न प्रत्यक्षात साकारचेच, असा निश्चय केला, असे अलिका गावातील मेजर सिंग यांनी सांगितले.
> पूलाचे बांधकाम आणि देखरेखीसाठी नेमली होती २५ सदस्यीय समिती
> हा पूल वाहतुकीसाठी खुला झाल्यानंतर दळणवळणाच्या दृष्टीने सव्वा लाख नागरिकांना होणार लाभ
> जिल्ह्याचे ठिकाण असलेले सिरसाचे अंतर ३० किलोमीटरने होणार कमी
> स्थानिक संत ब्रह्म दास यांच्या हस्ते पूलाचे उद्घाटन करण्याचा समितीचा आग्रह
> या गावकऱ्यांचा पंजाबपर्यंतचा प्रवास होणार सुखकर