एकतर्फी प्रेमातून मुलीला जाळण्याचा प्रयत्न होत असताना तिला वाचवण्यासाठी गेलेल्या आईचे गुरुवारी निधन झाले. अमरावती रमेश हरिजन (४०) असे त्यांचे नाव असून, त्या ९५ टक्के भाजल्या होत्या. अमरावती मसिना रुग्णालयात १४ दिवस मृत्यूशी झुंज देत होत्या.
अमरावती वांद्य्राच्या बी.जे.रोड गणेशनगर येथे कुटुंबीयांसोबत राहात होत्या. त्याच परिसरातील दीपक जट या माथेफिरूचे त्यांच्या मुलीवर एकतर्फी प्रेम होते. दीपक अमरावती यांच्या मुलीची वारंवार छेड काढायचा. त्यामुळे अमरावती यांच्या मुलीने त्याच्या कानाखाली मारली होती. याचाच राग मनात धरून १४ एप्रिलला अमरावती, त्यांची मुलगी आणि शेजारची दोन वर्षांची मुलगी वांद्रे कार्टररोड येथे आले असता दीपकने त्यांच्या मुलीवर पेट्रोल टाकून जाळण्याचा प्रयत्न केला. त्यावेळी अमरावती मुलीला वचवण्यासाठी पुढे गेल्या असता, हे पेट्रोल त्यांच्यासह लहान मुलीवर पडले. त्यानंतर दीपकने त्यांना पेटवून दिले. या दुर्घटनेत उपचारादरम्यान दोन वर्षांच्या मुलीचा मृत्यू झाला, तर ९५ टक्के भाजलेल्या अमरावती यांच्यावर अगोदर सायन व नंतर मसिना रुग्णालयात उपचार सुरू होते. मात्र १४ दिवस मृत्यूशी झुंज दिल्यानंतर गुरुवारी त्यांचे निधन झाले. याप्रकरणी वांद्रे पोलिसांनी दीपकवर हत्येचा गुन्हा नोंदवला आहे. न्यायालयाने दीपकला तुरुंगवासाची शिक्षा सुनावली आहे.