रिमोटद्वारे हायटेक पद्धतीने वीजचोरी करणाऱ्या ठाण्यातील फर्निचरच्या शोरूम मालकाला ठाणे न्यायालयाने दोन वर्षांची शिक्षा आणि पाच लाख रुपयांचा दंड ठोठावला आहे. वीजचोरीच्या या प्रकरणाचा ६ वर्षांनी निकाल लागला आहे.
मानपाडा येथील हितेश सावला याच्या मालकीच्या मे. बालाजी एंटरप्रायजेस फर्निचर शोरूमच्या थ्रीफेज मीटरमध्ये रिमोटद्वारे वीजचोरी करण्यात येत होती. मात्र ही वीजचोरी महावितरणच्या भरारी पथकाच्या नजरेतून सुटली नाही. या पथकाने २५ जानेवारी २०११ रोजी कारवाई करत शोरूममधील वीजचोरी पकडली. पथकाच्या तपासणीत थेट वीजचोरी होत असल्याचे निष्पन्न झाले होते. त्यावेळचे तत्कालीन अतिरिक्त कार्यकारी अभियंता प्रवीण दरोली यांनी या हायटेक वीजचोरी प्रकरणाचा छडा लावला होता. विद्युत अधिनियमनुसार ठाणे जिल्हा न्यायालयात आरोपी हितेश सावला याच्याविरुद्ध केस चालली. सहा वर्षांनी नुकताच या प्रकरणाचा निकाल लागला. न्यायालयाने सावला याला वीजचोरी केल्याबद्दल दोन वर्षांची शिक्षा आणि पाच लाख रुपये दंडही ठोठावला असल्याची माहिती महावितरणकडून देण्यात आली. वीजचोरी प्रकरणात ठोठावलेली सर्वात मोठी शिक्षा असल्याचा दावा महावितरणकडून करण्यात आला आहे