जादूटोणा, बाबा-बुवांमुळे अनेकदा अत्याचार आणि जीवावर बेतलेल्या घटना समोर येतात. तरीही लोक अंधश्रद्धांना बळी पडतात. अशीच काहीशी घटना राजस्थानमध्ये जोधपूरमधील लोहावत तालुक्याच्या एका गावात घडली. मांत्रिकाच्या सापाने दंश केल्याने एका व्यक्तीचा मृत्यू झाला. या घटनेनंतर मांत्रिक फरार झाला आहे.
राजस्थानमध्ये मांत्रिकाला भोपा म्हणतात. पीडित बाबुराम हा गावकरी भोपाकडे गेला. यावेळी भोपाच्या सापाने बाबुरामला दंश केला. सर्पदंशानंतर बाबुरामला हॉस्पिटलमध्ये दाखल करण्याऐवजी भोपाने त्याला आपल्या घरी नेले. बाबुरामला वाचवण्यासाठी बराचवेळ मंत्रोच्चार केले. उपचाराचे अतिशय विचित्र प्रकार शोधून काढले. यात बाबुरामची प्रकृती चिंताजनक झाल्यानंतर त्याच्या कुटुंबियांनी त्याला हॉस्पिटलमध्ये नेले. पण तिथे गेल्यावर डॉक्टरांनी बाबुरामला मृत घोषित केलं.
पोलिसांनी या प्रकरणी मांत्रिकाविरोधात कलम ३०४ नुसार गुन्हा दाखल केला आहे. उपचारात दिरंगाई केल्याचा आरोप तक्रारीतून करण्यात आला आहे. पण घटनेनंतर मांत्रिक फरार आहे. ‘गावातीलच एका घरात धार्मिक कार्यक्रम आयोजित करण्यात आला होता. यावेळी मांत्रिक इंद्रराम सुथार एका गोणीत तिथे सापांना घेऊन आला होता. आपल्या मंत्रविद्येने सापांना मी वश करू शकतो, असं त्याने सांगितलं. तिथं उपस्थित गावकऱ्यांच्या गळ्याभोवती त्याने साप टाकण्याचा प्रयत्न केला. पण सर्वांनी नकार दिल्यावर बाबुरामच्या गोळ्याभोवती त्याने साप टाकला. दुर्दैवाने यावेळी सापाने बाबुरामच्या गळ्याला दंश केला. यानंतर बाबुरामला घेऊन मांत्रिक इंद्रराम आपल्या घरी गेला, अशी माहिती पोलिसांनी दिली.