कॉमेडियन कपिल शर्मा याच्या द कपिल शर्मा शोमध्ये अश्लिल विनोद करणं माजी क्रिकेटपट्टू आणि पंजाबचे मंत्री नवज्योतसिंग सिद्धू यांना महागात पडलं आहे. सिद्धूंनी अश्लिल आणि द्विअर्थी विनोद केल्याने, वरिष्ठ वकील एच.सी अरोडा यांनी पंजाबच्या मुख्य सचिवांकडे तक्रार केली असून याप्रकरणी स्वत: पंजाबचे मुख्यमंत्री कॅप्टन अमरिंदर सिंग यांनी लक्ष घालण्याची मागणी या वकिलाने केली आहे.
अरोडा यांनी याप्रकरणी लेखी तक्रार अर्ज केला आहे.पत्नी आणि मुलीसोबत कपिलचा शो पाहात होतो. त्यावेळी सिद्धूंच्या आक्षेपार्ह विनोदामुळे भावना दुखावल्या, असं अरोडा यांनी म्हटलं आहे. या तक्रार अर्जात शोमधील काही विनोदांचा उल्लेख केला आहे. हे विनोद अभद्र आणि द्विअर्थी असल्याचा दावा त्यांनी केला आहे. हा आरोप करताना आरोडा यांनी पंजाब सरकारला मंत्रिपद आणि आचारसंहितेची आठवण करुन दिली. सिद्धूने माहिती आणि प्रसारण कायद्याचं उल्लंघन केल्याचं सांगत याप्रकरणी हायकोर्टातही जाण्याचा इशारा त्यांनी दिला आहे.
सिद्धू यांनी अरोडा यांचे सर्व आरोप फेटाळून लावले आहेत. या शोमध्येअश्लिलता असती, तर हा शो लोकप्रियतेमध्ये अव्वल नसता, असा दावा सिद्धू यांनी केला आहे. इतकंच नाही तर लोक फळं लागलेल्या झाडाला दगड मारतातच, असं टोलाही लगावला.