नागपुरी वडा भात

साहित्य

वड्यांसाठी

• ३ वाट्या तांदूळ,
• १ वाटी मोड आलेली मटकी, २ वाट्या हरबऱ्याची डाळ, १ वाटी तुरीची डाळ, पाऊण वाटी उडदाची डाळ
• मिरच्या, थोडे लाल तिखट, बारीक चिरलेला कांदा अर्धी वाटी, धने-जिरे पूड, लसूण, कोथिंबिर, कढीपत्ता, मीठ, फोडणीसाठी तेल. (हळद घालू नये)
• भातासाठी
• दोन वाटया तांदळाचा मोकळा फडफडीत भात
• तेल
• फोडणीचं साहित्य

पाककृती

सर्व डाळी रात्री भिजत घालून सकाळी जाडसर वाटाव्या. मटकीही जाडसर वाटून घ्यावी.

• मिरची-लसूण जाडसर वाटाव्यात. सर्व साहित्य वाटलेल्या डाळीत घालावे आणि सर्व एकजीव करावे. वाटलेल्या डाळीचे छोटे-छोटे चपटे वडे थापून गरम तेलात तळून काढावे.
• नंतर २ वाटया तांदळाचा साधा मोकळा भात करून घ्यावा. ज्या तेलात वडे तळले तेच तेल गरम करायला ठेवावे. प्रत्येकाला पानावर भात वाढला की ४-५ वडे कुस्करून घालावे.
• मोहरी , हिंग , हळद घालून तेलाची फोडणी भातावर  घालावी . जास्त तिखट खाणार्‍यांनी वरील तेलात ४/६ मिरच्या घालून तेल भातावर घ्यावे.
• या भाताबरोबर (साखर न घालता) ताकाची कढी करावी.