कफ परेड परिसरातील मेकर टॉवरच्या 21व्या मजल्यावर लागलेल्या आगीवर नियंत्रण मिळवण्यात फायर ब्रिगेडला यश आले आहे. मात्र, या दुर्घटनेत दोन जणांचा होरपळून मृत्यू झाल्याची माहिती फायर ब्रिगेडच्या अधिका-यांनी दिली आहे.
मंगळवारी सकाळी 6.30 च्या सुमापास मेकर टॉवरच्या 21व्या मजल्यावर आग लागली आणि क्षणार्धात संपूर्ण मजला आगीच्या भक्ष्यस्थानी पडला. आगीचे वृत्त मिळताच फायर ब्रिगेडच्या आठ गाड्या घटनास्थळी दाखल झाल्या व आगीवर नियंत्रण मिळवण्याचे प्रयत्न सुरू झाले. तसेच तीन अॅम्ब्युलन्स आणि चार वॉटर टँकरही घटनास्थळी दाखल झाले. या दुर्घटनेत दोन जणांचा होरपळून मृत्यू झाल्याचे समजते.
21 व्या मजल्यावर आग लागल्याने सुरुवातीला आग विझवण्यात अडचणी निर्माण झाल्या, त्यामुळे फायर ब्रिगेडच्या जवानांनी शिडीच्या सहाय्याने अग्नितांडव शमवायला सुरुवात केली. शर्थीचे प्रयत्न करुन अखेर त्यांनी आगीवर नियंत्रण मिळवले आहे. मात्र, आग नेमक्या कोणत्या कारणामुळे लागली हे जरी स्पष्ट नसेल तरी, शॉर्ट सर्किटमुळे ही दुर्घटना घडल्याची प्राथमिक शक्यता व्यक्त होत आहे.