नक्षलवाद्यांच्या गोळीबारात रमेश दोहे हेडो (३५) हा युवक जखमी झाला. ही घटना एटापल्ली तालुक्यातील कसनसूर उपपोलीस ठाण्याअंतर्गत रेंगाटोला या गावी घडली.
काही वर्षापूर्वी रमेशला नक्षलवाद्यांनी पकडले होते; परंतु तो नक्षलवाद्यांच्या तावडीतून पळाला व गडचिरोली येथे राहत होता. सोमवारी रमेश रेंगाटोला गावी गेला होता.
रमेश रेंगाटोला येथे आल्याची माहिती नक्षलवाद्यांना मिळताच मंगळवारी दुपारी कसनसूर दलमच्या अॅक्शन टीमचे पाच-सहा साध्या वेषभूषेतील नक्षलवादी रेंगाटोला गावात गेले व त्यांनी रमेशला घराबाहेर बोलावून बंदुकीने त्याच्यावर गोळीबार केला.
त्यानंतर नक्षलवादी जंगलात पसार झाले. नक्षलवाद्यांनी रमेशवर दोन गोळ्या झाडल्या; परंतु नेम चुकल्याने तो बचावला. रमेशने आपला बचाव केला; परंतु एक गोळी त्याच्या पाठिला लागल्याने तो जखमी झाला. रमेशला गडचिरोली येथील जिल्हा सामान्य रुग्णालयात भरती करण्यात आले आहे.