मराठवाड्यातील औरंगाबादमध्ये २००६ मध्ये सापडलेल्या शस्त्रसाठाप्रकरणी मुंबईतील मोक्का न्यायालयाने अबू जुंदालसह सात दोषींना मरेपर्यंत जन्मठेपेची शिक्षा सुनावली आहे. तसेच इतर २ आरोपींना १४ वर्षांच्या जन्मठेपेची शिक्षा ठोठावण्यात आली असून आणखी तिघांना ८ वर्षांच्या जन्मठेपेची शिक्षा सुनावण्यात आली आहे. मुंबईतील मोक्का न्यायालयात मंगळवारी झालेल्या सुनावणी दरम्यान शिक्षा सुनावण्यात आली.
मात्र खटल्याच्या सुनावणीदरम्यान त्यांनी १० वर्ष तुरूंगात काढल्याने त्यांची सुटका होणार आहे. याप्रकरणी न्यायालयाने गेल्या महिन्यात (२८ जुलै) अबु जुंदालसह ११ आरोपींना दोषी ठरवले होते, अखेर त्यांना शिक्षा सुनावण्यात आली. या प्रकरणात एकूण २२ जणांना अटक झाली होती. त्यातील ११ आरोपी दोषी ठरले तर, १० जणांची सुटका झाली. आरोपींवर मोक्कातंर्गत आरोप सिद्ध होऊ शकले नाहीत. त्यामुळे त्यांच्यावरील मोक्का हटवण्यात आला.
८ मे २००६ रोजी महाराष्ट्र दहशतवाद विरोधी पथकाने टाटा सुमो आणि इंडिका कारचा पाठलाग करुन चांदवड-मनमाड महामार्गावर दोन गाडया पकडल्या होत्या. यावेळी तीन संशयितांना अटक करुन तीस किलो आरडीक्स, दहा एके-४७ आणि ३२०० बुलेट जप्त केल्या होत्या. त्यावेळी इंडिका गाडी जुंदाल चालवत होता. पोलिसांना चकवून तिथून निसटण्यात तो यशस्वी ठरला. मुंबईवरील २६/११ दहशतवादी हल्ल्यात त्याची महत्वाची भूमिका होती. २०१२ मध्ये सौदी अरेबियावरुन त्याला भारतात आणण्यात आले.