भारतीय जनता पक्षातील गांधी गटाच्या उमेदवार नंदा साठे यांनी महापौरपदाच्या निवडणुकीतून माघार घेतल्याने शिवसेनेच्या उमेदवार सुरेखा कदम यांची महापौरपदी बिनविरोध निवड झाली आहे.
महापौर-उपमहापौरपदाची निवडणूक काही तासांवर आल्यानंतरही “कोणाच्या गळ्यात माळ पडणार,‘ याची उत्कंठा कायम होती. दोन्ही गटांकडून दावे-प्रतिदावे करण्यात येत होते. या निवडणुकीत तटस्थ राहण्याचा निर्णय कॉंग्रेसने घेतला होता. महापौर-उपमहापौरपदाची निवडणूक आज (मंगळवारी) सकाळी 11 वाजता महापालिकेच्या सभागृहात पार पडली.
शिवसेनेसाठी मागील आठवड्यापर्यंत एकतर्फी वाटणारी ही निवडणूक खासदार दिलीप गांधी आणि राष्ट्रवादी कॉंग्रेस, कॉंग्रेस यांच्या एकत्र येण्यामुळे चुरशीची केली होती. भारतीय जनता पक्षातील गांधी गटाच्या नंदा साठे व श्रीकांत छिंदम यांनी अनुक्रमे महापौर व उपमहापौरपदासाठी अर्ज दाखल केले होते. पण, शिवसेना नेते एकनाथ शिंदे यांच्या हस्तक्षेपानंतर नंदा साठे यांनी निवडणुकीतून माघार घेतली. त्यामुळे सुरेखा कदम यांची बिनविरोध निवड झाली. दिलीप गांधी आणि एकनाथ शिंदे हे एकाच गाडीतून सभागृहात आल्याचे पहायला मिळाले.
उपमहापौरपदासाठी भाजपचे गटनेते दत्ता कावरे यांनी अर्ज भरला आहे. एकूण 68 सदस्यांच्या सभागृहात बहुमतासाठी 35 मतांची गरज होती. चुरशीचे रूपांतर तणावात होऊ लागल्याने प्रशासनानेही या निवडणुकीची गांभीर्याने नोंद घेतली होती. निवडणुकीच्या ठिकाणापासून 200 मीटर परिसरात सकाळी दहा ते सायंकाळी पाच वाजेपर्यंत प्रतिबंधात्मक आदेश प्रांताधिकाऱ्यांनी काढला आहे.