गुजरातचे राज्यपाल ओ. पी. कोहली यांचे निवासस्थान असलेल्या राजभवनाच्या दुरुस्ती आणि सजावटीसाठी गुजरात सरकार तब्बल २० कोटींचा खर्च करणार आहे. यापूर्वी कर्नाटकचे राज्यपाल आणि गुजरातचे माजी अर्थमंत्री वाजुभाई वाला हे राजभवनाची दुरुस्ती आणि सजावटीसाठी केलेल्या कोट्यवधींच्या खर्चामुळे चर्चेत आले होते.
राजभवनच्या दुरुस्ती आणि देखभालीचे ४० वर्षांपासून काम करत असलेल्या जीएडी (गुजरात अॅडमिनिस्ट्रेशन डिपार्टमेंट) ने राजभवनच्या दुरुस्ती आणि सजावटीच्या खर्चाचा प्रस्ताव पाठवला होता. राजभवनात व्हीव्हीआयपी गेस्ट हाऊस आणि बॅंकेट हॉलची गरज होती. सुरूवातीला त्यासाठी ११.५० कोटींचा निधी जाहीर करण्यात आला होता. मात्र, उर्वरित सजावटीसाठी एकूण २० कोटींचा खर्च होणार असल्याचे सांगण्यात आले, अशी माहिती जीएडीच्या सूत्रांनी दिली.
दरवर्षी राजभवनसाठी करण्यात येणाऱ्या खर्चात कमालीची वाढ होत आहे. २०११-१२ या वर्षात ४.७४ कोटी (त्यात राज्यपाल आणि कर्मचाऱ्यांचे वेतन यांचा समावेश), २०१४-१५ मध्ये ५.८७ कोटी खर्च करण्यात आले. तर २०१५ – १६ या चालू वर्षात खर्चात वाढ करून ६.१३ कोटींवर हा आकडा पोहोचला आहे, असे सूत्रांनी सांगितले.