पोलिस भरतीतील उमेदवारांची ‘अग्निपरीक्षा’

राज्यात दोन वर्षांनंतर पोलिस भरतीप्रक्रिया राबविली जात आहे. नाशिक पोलिस आयुक्तालयातील 31 पोलिस शिपाई पदासाठी चार हजार 916 उमेदवारी अर्ज दाखल झाले होते. यासाठीची मैदानी चाचणी 29 मार्च ते 5 एप्रिलपर्यंत घेण्यात आली. त्यातून लेखी परीक्षेसाठीची गुणांकन यादी जाहीर करण्यात आली आणि त्यानुसार शनिवारी (ता. 16) तब्बल 644 उमेदवारांची लेखी परीक्षा घेतली जाणार आहे. लेखी परीक्षा कोणत्याही शाळा-महाविद्यालयांमध्ये न घेता थेट पोलिस मुख्यालयाच्याच कवायत मैदानावर तळपत्या उन्हात होईल. सध्या नाशिकमध्ये उन्हाची तीव्रता सरासरीपेक्षा अधिक असून, 38 अंश सेल्सियस तापमानापर्यंत पारा गेला. भरदिवसा शहरातील रस्त्यावर शुकशुकाट असताना, पोलिस आयुक्तालयाकडून मात्र तळपत्या उन्हात लेखी परीक्षा घेण्याचा धक्कादायक निर्णय घेण्यात आला आहे.

मंडप असले तरीही झळांचा त्रास
पोलिस आयुक्तालयातर्फे परीक्षार्थी उमेदवारांसाठी कवायत मैदानावर मंडप टाकले जाणार आहेत; परंतु 644 उमेदवार हे मैदानावर बसविल्यानंतर टाकला जाणारा मंडप पुरेसा ठरणार नाही. तसेच, मोकळ्या मैदानावर टाकला जाणारा मंडप हवेमुळे तग धरून राहील, याची कोणतीही शाश्‍वती नाही. वाढत्या उन्हामुळे उमेदवारांना भोवळ येण्याची शक्‍यता आहे. असे असतानाही पोलिस आयुक्तालयाकडून लेखी परीक्षा मोकळ्या मैदानावरच घेण्याचा अट्टहास कशासाठी, असा प्रश्‍न उपस्थित होत आहे.

हाकेच्या अंतरावर महाविद्यालय
पोलिस आयुक्तालयावर मराठा विद्याप्रसारक समाजाचे मराठा हायस्कूल व केटीएचएम महाविद्यालय आहे. केटीएचएम महाविद्यालयात विद्यापीठाच्या पदवी विभागाच्या परीक्षा सुरू असल्या, तरी अनेक वर्ग रिकामे असण्याची शक्‍यता आहे. तसेच, मराठा हायस्कूलच्या विद्यार्थ्यांना उन्हाळी सुटी जाहीर झाली आहे. त्यामुळे त्या ठिकाणीही पोलिस भरतीच्या 644 उमेदवारांची लेखी परीक्षा होणे सहज शक्‍य असतानाही लेखी परीक्षा कवायत मैदानावरच घेण्याचा घाट घातला जात आहे.