पुणे लोकलसाठी योजना करण्याचा विचार-प्रभू

मुंबईच्या धर्तीवर पुण्यातही लोकल रेल्वे सुरु करण्याबाबत काही योजना करण्याचा विचार आहे, त्यासाठी निधी देण्यात येण्याची शक्यता असल्याचे आज (शनिवार) रेल्वेमंत्री सुरेश प्रभू यांनी सांगितले.

सुरेश प्रभू म्हणाले की, शाळेत असल्यापासून हा विषय आपल्याला कधीतरी सांगितला जातो. मोठे होताहोता मात्र या ‘व्हिजन‘ बदलत जातात. व्हिजन प्रत्यक्ष कृतीत कसे आणावे, हे आव्हान असते. वास्तव हे स्वप्नापेक्षा वेगळे असते. आर्थिक विकासासशिवाय नोकऱ्या शक्य नाहीत. आर्थिक विकासासाठी गुंतवणूक हवी किंवा खर्च करण्याची क्षमता वाढवायला हवी. या गोष्टी परस्परांवर अवलंबून आहेत. लोकांचे उत्पन्न वाढविणे हे आव्हान आहे. घरगुती बचत, कॉर्पोरेट बचत आणि शासकिय बचत या तिन्ही गोष्टींवर काम होणे आवश्यक आहे. कमी आर्थिक उत्पन्न असणारा गट बचतीत हातभार लावणे जवळपास अशक्य आहे. त्यातल्या त्यात मध्यमवर्गाकडून या अपेक्षा करता येऊ शकतात. मात्र, मध्यमवर्गाने देशाच्या आर्थिक विकासाला हातभार लावायचा झाल्यास या वर्गाला नोकऱ्या देणे सरकारचे कर्तव्य आहे. गुंतवणूक, उत्पन्न, बचत, नोकरी, विकास या गोष्टी परस्परांच्या हातात हात घेत पुढे जातात. एफडीआय वाढविले पाहिजे. त्यातूनच विकासाचा गाडा सुकर होणार आहे. या प्रकारे गुंतवणूक वाढल्यास दरडोई उत्पन्न वाढणार आहे. ‘ब्ल्यू कॉलर जॉब्स‘ ही आजची गरज आहे. उत्पादन क्षेत्र हे परिणामकारकतेने करू शकेल. मेक इन इंडिया हे खरेतर ‘मेकिंग ऑफ टुमॉरोज इंडिया‘ आहे. डिजिटल इंडिया आणि स्किलिंग इंडिया याचाही हातभार अनेक थरांनी विकासाची शिडी चढण्याचा होणार आहे. पायाभूत सुविधांत जेवढी गुंतवणूक वाढेल, तेवढा विकासाचा गाडा वेगाने हाकला जाईल.