शलाकाला मिळालेल्या शिष्यवृत्तीमध्ये जाण्या-येण्याचा विमानखर्च आणि दोन्ही वर्षांची शैक्षणिक फी यांचाही समावेश आहे. ‘ग्रॅज्युएट इन्स्टिट्यूट ऑफ आंत्रप्रेन्युअरल स्टडीज’ (जीआयईएस) या संस्थेत शलाका दोन वर्षांचा एमबीए अभ्यासक्रम पूर्ण करणार असून, त्यामध्ये मुख्यतः उद्योजकीय कौशल्यांचा अभ्यास करणार आहे. जपानची राजधानी तोक्योपासून सुमारे ३०० किलोमीटर अंतरावर असलेल्या नीगाता प्रांतात ही संस्था आहे.
‘जपानी भाषा शिकणारे भारतीय विद्यार्थी जपानी भाषेतील उच्च शिक्षणासाठी विविध शिष्यवृत्त्या मिळवून जपानमध्ये जातातच. मात्र, भाषेच्या विद्यार्थ्याला मॅनेजमेंटमधील अभ्यासक्रमासाठी जपानी सरकारची शिष्यवृत्ती मिळणे ही गोष्ट प्रथमच घडते आहे,’ अशी माहिती टिळक महाराष्ट्र विद्यापीठाच्या जपानी भाषा विभागाच्या समन्वयक मानसी शिरगुरकर यांनी ‘मटा’ला दिली. शलाका ही ‘टिमवि’चीच एमए जपानी भाषेची विद्यार्थिनी आहे.
शलाका मूळची डोंबिवलीची असून, तिने तेथीलच संवादिनी अॅकॅडमीमध्ये जपानी भाषा शिकण्यास सुरुवात केली. भाषेच्या गोडीमुळे तिने चार वर्षांत जपानी भाषेच्या चारही प्रोफिशियन्सी टेस्ट्स उत्तीर्ण केल्या. भाषेवरील प्रभुत्त्वामुळे तिला पुण्यात ‘टीसीएस’मध्ये भाषांतरकार आणि दुभाषा म्हणून नोकरी मिळाली. गेली दहा वर्षे ती तेथेच काम करीत आहे.
‘टीसीएसमध्ये काम करताना सातत्याने तांत्रिक स्वरूपाचे काम करावे लागते. त्यामुळे अभिजात जपानी भाषेचा अभ्यास थोडा मागे पडला होता. म्हणून मी दोन वर्षांपूर्वी टिमविमध्ये जपानी भाषेतील एमए अभ्यासक्रमाला प्रवेश घेतला. ‘टिमवि’चे ‘जीआयईएस’शी सहकार्य असल्याने त्यांच्या एमबीए अभ्यासक्रमाविषयी आणि त्यासाठी उपलब्ध शिष्यवृत्तीविषयी मला माहिती मिळाली. मी त्यासाठी अर्ज केला आणि मुलाखत; तसेच संशोधन योजना सादर केल्यानंतर मला शिष्यवृत्तीसह अभ्यासक्रमाला प्रवेश मिळाला,’ असे शलाकाने सांगतिले.
‘कचरा व्यवस्थापनाचा अभ्यास’
शलाका जपानी भाषेची विद्यार्थिनी असली, तरी तिचा एमबीए कोर्ससाठीचा मुख्य विषय असणार आहे, कचरा व्यवस्थापन. ती म्हणाली, ‘मी कंपनीच्या कामानिमित्त जपानला गेले होते, तेव्हा मला तेथील कचरा व्यवस्थापनाची प्रक्रिया जवळून पाहता आली होती. अनेक दिवस तो विषय माझ्या डोक्यात होता. या अभ्यासक्रमासाठी संशोधन योजना तयार करताना, ज्या विषयाचे रूपांतर उद्योगात होऊ शकते, असा विषय घ्यायचा होता. तेव्हा मी कचरा व्यवस्थापन आणि पुनर्वापर अशी सांगड घालून योजना तयार केली.’