मोबाईलवर गेम खेळल्याबद्दल ओरडत आईने अभ्यास करायला सांगितल्याने १२ वर्षीय मुलाने स्वत:वर केरोसिन टाकून जाळून घेतल्याची धक्कादायक घटना मुंबईत घडली आहे. या दुर्दैवी घटनेते तो मुलगा २५ टक्के भाजला असून त्याच्यावर रुग्णालयात उपचार सुरू आहेत.
मुंबईतील गणेश नगर भागात शनिवारी रात्री हा धक्कादायक प्रकार घडला. सातवीत शिकणार सय्यद कैफ अली हा आई-वडील व दोन भावंडांसह राहतो. शनिवारी रात्री ८.३० च्या सुमारास तो क्लासवरून घरी परत आला व आईकडे खाण्यास मागितले, त्याच्या आईने त्याला नूडल्ससाठी पैसे दिले. घरी येऊन सय्यदने नूडल्स बनवून खाल्ल्या व बेडरूममध्ये जाऊन तो मोबाईलवर गेम खेळू लागला. मात्र तेवढ्यात त्याची आई तेथए आली व तिने सय्य्दकडील फोन हिसकावून घेत त्याला अभ्यास करण्यास सांगितले. या घटनेमुळे संतापलेला सय्यद तडक हॉलमध्ये गेला व त्याने स्वत:वर केरोसिन टाकून स्वत:ला पेटवून घेतले. मात्र आगीचे चटके सहन न झाल्याने तो ओरडू लागला असता त्याच्या कुटुंबियांना हा प्रकार समजला. त्यांनी तत्काळ त्याच्यावर पाणी टाकत आग विझवली व उपचारांसाठी तातडीने रुग्णालयात दाखल केले.