पश्चिम बंगालची राजधानी कोलकात्यात एक भयंकर घटना घडली आहे. आरजी कर वैद्यकीय महाविद्यालय आणि रुग्णालयात एक महिला प्रशिक्षणार्थी डॉक्टर मृतावस्थेत आढळली. ती पदव्युत्तर शिक्षण घेत होती. सोबतच चेस्ट मेडिसिन विभागात कार्यरत होती. रुग्णालयातील कर्मचाऱ्यांनी दुपारी बाराच्या सुमारास आपत्कालीन विभागाच्या चौथ्या मजल्यावर तिचा मृतदेह पाहिला. त्यानंतर रुग्णालयात एकच खळबळ उडाली आणि तणावपूर्ण परिस्थिती निर्माण झाली.
कोलकाता पोलिसांच्या उत्तर उपनगरीय विभागाचे उपायुक्त अभिषेक गुप्ता यांच्या नेतृत्त्वातील पोलीस पथकानं घटनास्थळी पोहोचून तपास सुरु केला आहे. यानंतर शहराचे पोलीस आयुक्त विनीत कुमार गोयलदेखील रुग्णालयात पोहोचले. मृत तरुणीच्या शरीरावर जखमा होत्या, अशी माहिती रुग्णालयातील काही डॉक्टरांनी दिली. मृत तरुणीचे कपडे फाटलेले होते. तिचा मृतदेह अर्धनग्न अवस्थेत होता, असं डॉक्टरांनी सांगितलं.
डॉक्टर तरुणीवर बलात्कार करण्यात आला. त्यानंतर तिची हत्या करण्यात आल्याची माहिती पोलिसांनी दिली आहे. घटना उघडकीस आल्यानंतर रुग्णालयातील कर्मचाऱ्यांनी आंदोलन सुरु केलं. काहींना पोलिसांशी हुज्जत घातली. जवळपास १० तास आंदोलन सुरु होतं. त्यामुळे रुग्णालयात गोंधळाची आणि तणावाची परिस्थिती निर्माण झाली होती. याच गोंधळाच्या परिस्थितीत पोलिसांनी डॉक्टर तरुणीचा मृतदेह शवविच्छेदनासाठी पाठवला.
डॉक्टर तरुणीचा मृतदेह सरकारी रुग्णालयाच्या हॉलमध्ये सापडला. तरुणीवर लैंगिक अत्याचार करुन मग तिची हत्या करण्यात आल्याचं प्राथमिक तपासानंतर पोलिसांनी सांगितलं. प्राथमिक ऑटोप्सी रिपोर्टनुसार, तरुणीच्या गुप्तांगासह तोंडावर आणि डोळ्यांवर रक्ताचे डाग आढळून आले. तिच्या चेहऱ्यावर, पोटावर, डाव्या अंगठ्यावर, मानेवर, उजव्या हाताच्या बोटासह ओठांवर जखमा होत्या.
तरुणीच्या मानेकडील भागाचं हाड मोडलेल्या अवस्थेत आहे. त्यावरुन तिची हत्या गळा दाबून करण्यात आल्याची शक्यता आहे. मध्यरात्री ३ ते सकाळी ६ च्या दरम्यान हत्या झाल्याचा अंदाज पोलिसांनी वर्तवला. या घटनेचा अधिक तपास पोलिसांकडून सुरु आहे. पोलिसांनी गुन्हा नोंदवून तपास सुरु केला आहे.
आरजी कर वैद्यकीय महाविद्यालयात माझ्या मुलीवर बलात्कार झाला. मग तिची हत्या करण्यात आली. वैद्यकीय महाविद्यालयाचं प्रशासन आता सत्य लपवण्याचा प्रयत्न करतंय, असा गंभीर आरोप मृत मुलीच्या वडिलांनी केला. मुख्यमंत्री ममता बॅनर्जींनी मृत तरुणीच्या आई, वडिलांना फोन करुन दोषींवर कठोर कारवाई करण्याचं आश्वासन दिलं आहे.