दारूसाठी पैसे मागण्याच्या वादातून अल्पवयीनांकडून गुंडाच्या डोक्यात दगड घालून खून करण्यात आल्याची घटना मध्यरात्री हडपसर परिसरातील रामटेकडी परिसरात घडली. याप्रकरणी वानवडी पोलिसांनी पाच अल्पवयीनांना ताब्यात घेतले.
राज शिवशरण (वय ३६, रा. रामटेकडी, हडपसर) असे खून झालेल्या गुंडाचे नाव आहे. शिवशरण याच्याविरुद्ध वानवडी पोलीस ठाण्यात गंभीर स्वरुपाचे गुन्हे दाखल आहेत. शिवशरण आणि अल्पवयीन मुले ओळखीचे आहेत. शुक्रवारी मध्यरात्री दीड वाजण्याच्या सुमारास रामटेकडीतील वंदेमातरम चाैकात शिवशरण आणि अल्पवयीन मुलांमध्ये दारूसाठी पैसे मागितल्याने वाद झाला. शिवशरण आणि मुले दारू प्यायली होती. वादातून मुलांनी शिवशरणला मारहाण करण्यास सुरुवात केली. मुलांनी शिवशरणच्या डोक्यात दगड घातला, तसेच त्याच्या डोक्यात दारूची बाटली फोडली.
गंभीर जखमी झालेल्या शिवशरणला पोलिसांनी ससून रुग्णालयात दाखल केले. उपचारांपूर्वीच त्याचा मृत्यू झाला. वानवडीचे वरिष्ठ पोलीस निरीक्षक संजय पतंगे यांनी घटनास्थळी भेट दिली. अल्पवयीन मुलांना पोलिसांनी ताब्यात घेतले असून, दारूसाठी पैसे मागितल्याने झालेल्या वादातून शिवशरणचा खून झाल्याची माहिती पोलीस निरीक्षक पतंगे यांनी दिली.