आटपाडीमध्ये डाळिंबाला प्रतिकिलो तब्बल ५५१ रुपयांचा सर्वोच्च दर

आटपाडी बाजार समिती सौदे बाजारात डाळिंबाबरोबरच ड्रॅगन फ्रूट, पेरूचीही दैनंदिन आवक वाढलेली आहे. चांगल्या मालाबरोबरच डागी मालाचेही दर तेजीत आहेत. शेतकऱ्यांनी बागेत येणाऱ्या व्यापाऱ्यांना कमी दरात माल देण्याऐवजी बाजार समितीच्या सौदे बाजारात आपला माल देऊन चांगला भाव मिळवावा, असे आवाहन मंगलमूर्ती उद्योगसमूहाचे अध्यक्ष पंढरीनाथ नागणे यांनी केले आहे. बाजार समिती सौदे बाजारात राज्यातील आणि देशातील फळविक्रेते आणि व्यापारी हजेरी लावतात. बाजारात पारदर्शक कारभारामुळे दर्जेदार आणि डागी डाळिंबालादेखील चांगला दर मिळत असल्याचे बाजार समितीचे सभापती संतोष पुजारी यांनी सांगितले.