मद्यधुंद अवस्थेतील चालकाने भरधाव ऑडी कारने दोन रिक्षांना जोरदार धडक दिल्याची घटना सोमवारी मुलुंड पश्चिमेकडील डम्पिंग रोडवर घडली. या अपघातामध्ये कोणतीही जीवितहानी झाली नसली तरी चौघे गंभीर जखमी झाले. अपघातानंतर घटनास्थळावर कार सोडून पळालेला चालक विजय गोरे (२६) याला मुलुंड पोलिसांनी अटक केली.
दोन रिक्षा एकमेकींवर आदळल्या
मुलुंड पश्चिमेकडील डम्पिंग रोडवर सकाळी ६.१५ वाजताच्या सुमारास वेगात चाललेल्या ऑडी कारने समोरून येणाऱ्या एका रिक्षाला जोरात धडक दिली. ही धडक इतकी जोरदार होती की, ती रिक्षा अन्य एका रिक्षावर आदळली. या विचित्र अपघातात संतोष वालेकर (४९), विवेक जैस्वाल (२६) या दोघा रिक्षाचालकांसह प्रकाश जाधव (४६) आणि हनुमंत चव्हाण (५७) हे दोन प्रवासी जखमी झाले.
कार-मोबाईल सोडून पळाला
अपघात घडल्यानंतर कार चालक विजय कार आणि मोबाइल घटनास्थळी ठेवून पळून गेला. घटनेची माहिती मिळताच मुलुंड पोलिस घटनास्थळी पोहोचले. पोलिसांनी येथील नागरिकांच्या मदतीने जखमींना जवळच्या रुग्णालयात दाखल केले. जखमींची प्रकृती स्थिर असल्याचे पोलिसांनी म्हटले आहे.
मालाडमधील घराला कुलूप
घटनास्थळावर सापडलेली ऑडी कार आणि मोबाइलवरून पोलिसांनी चालकाचा शोध सुरू केला. कारचे रजिस्ट्रेशन मालाडच्या पत्त्यावर असल्याने पोलिसांनी मालाड गाठले. पण हे घर विकून विजय सध्या कांजुरमार्ग पश्चिमेकडील ‘रुणवाल फॉरेस्ट’मध्ये राहत असल्याचे कळले. पोलिस रुणवाल फॉरेस्टमध्ये पोहोचले असता विजयच्या घराला कुलूप होते. विजय कांजुरमार्ग पूर्वेकडे राहणाऱ्या बहिणीकडे लपला असल्याचे समजताच पोलिसांनी तिथे जाऊन त्याच्या मुसक्या आवळल्या.
भांडुपमध्ये मद्यपान
विजय तावडीत सापडला त्यावेळी त्याच्या तोंडातून दारूचा वास येत होता. पोलिसांनी रुग्णालयात नेऊन त्याची वैद्यकीय तपासणी केली. रविवारी संध्याकाळी घरातून बाहेर पडल्यानंतर विजयने भांडुपच्या एका बारमध्ये मद्यपान केले. तिथून ठाणे, कर्जत असा फिरत पहाटे मुंबईत येण्यासाठी निघाला. डम्पिंग रोडवर कारवरील नियंत्रण सुटल्याने अपघात झाला.