कर्ज घेतलेले नसतानाही त्याच्या वसुलीसाठी एका महिलेला फोन करून अर्वाच्य भाषेत शिवीगाळ केल्याप्रकरणी ठाणे खंडणीविरोधी पथकाने कर्जवसुलीचे काम करणाऱ्या भाईंदर येथील टेली कॉलसेंटरचा मालक, एक टेलिकॉलर आणि टेलिकॉम कंपनीचा एक प्रतिनिधी अशा तिघांना अटक केली. त्यांच्याकडून चार हार्डडिस्क, एक जीएसएम गेटवे, २४ पोर्टस्विच, एक राऊटर, तीन मोबाइल जप्त करण्यात आले. राहुलकुमार दुबे, शुभम ओझा आणि अमित पाठक अशी आरोपींची नावे आहेत. गंभीर बाब म्हणजे, टेलिकॉम कंपनीचा प्रतिनिधी हा ग्राहकांना फसवून, त्यांच्या नावावर अतिरिक्त सिमकार्ड काढून ते संबधित कॉल सेंटरला देत होता. नंतर या सिमकार्डवरून फोन करून कर्जवसुलीसाठी तगादा लावण्यात येत असल्याची बाब चौकशीमध्ये समोर आली आहे.
धक्कादायक बाबींचा उलगडा
तक्रारदार महिला मराठी चित्रपट क्षेत्रातील एका प्रसिद्ध व्यक्तीची पत्नी आहे. या महिलेला विविध नंबरवरून फोन करून शिवीगाळ केल्याप्रकरणी २ जुलै रोजी चितळसर पोलिस ठाण्यात गुन्हा दाखल झाला होता. ठाणे खंडणीविरोधी पथकाने, ज्या नंबरवरून फोन आला होता, त्या अंधेरीतील व्यक्तीकडे चौकशी केली असता, हा नंबर त्याने घेतलाच नसल्याची बाब समोर आली. नंतर, पोलिसांनी टेलिकॉम कंपनीचा प्रतिनिधी राहुलकुमार दुबे (३३) याला ताब्यात घेतले. त्याच्या चौकशीमध्ये धक्कादायक बाबींचा उलगडा झाला.
दुबे हा लक्ष्य पूर्ण करण्यासाठी त्याच्याकडे येणाऱ्या ग्राहकांची फसवणूक करत, त्यांच्या नावावर दोन-तीन सिमकार्ड घेत होता. एक सिमकार्ड ग्राहकाला देऊन, उरलेली सिमकार्ड कर्जवसुलीचे काम करणाऱ्या भाईंदर पूर्वेकडील सिटीझन कॅपिटल या टेली कॉल सेंटरला दिल्याची माहिती दुबे याने पोलिसांना दिली. दुबे याला अटक करत पोलिसांनी सिटीझन कॅपिटलच्या कार्यालयावर छापा मारला. कॉल सेंटरचा चालक-मालक शुभम ओझा (२९) आणि टेलिकॉलर अमित पाठक (३३) यांना ताब्यात घेतले. ओझा याने सदर सिमकार्ड कर्जवसुलीसाठी टेली कॉलिंगसाठी वापरले असून टेलिकॉलर पाठक याच्याकडे ते देण्यात आल्याची बाब चौकशीमध्ये उघड झाली. या कंपनीने हैदराबाद येथील एक फायनान्स कंपनी तसेच दोन बँकांच्या कर्जवसुलीसाठी करार केला होता.
आरोपींनी संबंधित महिलेस कर्ज न घेताही त्यांना फोन करून शिवीगाळ केली, अशी माहिती गुन्हे शाखेचे पोलिस उपायुक्त शिवराज पाटील यांनी दिली. दोन वर्षांपासून हे टेली कॉल सेंटर चालू असून येथे १८ कर्मचारी करतात. त्यांचीही चौकशी होण्याची शक्यता आहे. ही कामगिरी खंडणीविरोधी पथकाचे वपोनि मालोजी शिंदे, पोनि वनिता पाटील, सपोनि सुनील तारमाळे यांच्या पथकाने केली. दरम्यान, मराठी चित्रपट क्षेत्रातील संबंधित प्रसिद्ध व्यक्तीला आणि त्यांच्या आईलाही कर्जवसुलीसाठी तगादा लावल्याची बाब समोर आली आहे.
राहुलकुमार दुबे हा सिमकार्ड खरेदीसाठी आलेल्या ग्राहकांकडून अतिरिक्त कागदपत्रांवर अंगठ्याचे ठसे घेऊन त्यावर दुसरे सिमकार्ड घेत होता. अशाप्रकारे त्याने २५ सिमकार्डे कॉल सेंटरला दिली होती. एक फायनान्स कंपनी आणि दोन बँकांचे कर्जवसुलीचे काम करणाऱ्या सिटीजन कॅपीटलने सिमकार्डसाठी एका टेलिकॉम कंपनीकडे अर्ज केला होता. मात्र, या कंपनीने त्यांची मागणी फेटाळली. त्यामुळे त्यांनी या गैरमार्गाने सिमकार्ड घेतल्याचे पोलिस उपायुक्त शिवराज पाटील यांनी सांगितले.