पावसाळ्याला सुरुवात होताच ठाण्यातील बाजारात रेनकोट, छत्री विक्रिसाठी उपलब्ध झाल्या आहेत. यंदा रेनकोट आणि छत्र्यांमध्ये वैविध्य पाहायला मिळत असून त्यांच्या दरात १० ते २० टक्क्यांनी वाढ झाली आहे. यंदा बाजारात महिलांसाठी खास नक्षिकाम असलेली पारदर्शक अशी मोठ्या आकरातील छत्री विक्रीसाठी उपलब्ध झाली आहे. ही छत्री खरेदी करण्यासाठी तरुणींची गर्दी होत आहे, अशी माहिती ठाण्यातील एका विक्रेत्याने दिली.
ठाणे शहरात गेल्या काही दिवसांपासून पावसाला सुरूवात झाली आहे. या पावसात भिजावे लागू नये म्हणून नागरिकांनी छत्री, रेनकोटीची खरेदी सुरू केली आहे. बाजारात रेनकोट, छत्री, घरांवर टाकायला ताडपत्री विक्रीसाठी उपलब्ध झाल्याचे पाहायला मिळत आहे. हे साहित्य खरेदी करण्यासाठी नागरिकांची बाजारात गर्दी होऊ लागली आहे. यंदा बाजारात लहान मुलांपासून ते मोठ्यांपर्यंतच्या रेनकोट आणि छत्री मध्ये वैविध्य आले आहेत. परंतू, यंदाच्या वर्षी या साहित्यांमध्ये १० ते २० टक्क्यांनी वाढ झाली आहे.
यंदा बाजारात लहान मुलामुलींसाठी टॉम आणि जेरी, डोरेमॉन, डिझनी कार्टून्स, छोटा भीम, बॅटस् मॅन असे विविध कार्टून्सचे रेनकोट उपलब्ध आहेत. यामध्ये हलक्या दर्जाचे रेनकोट २५० रुपयांपासून ते ३६० रुपयांपर्यंत तर, चांगल्या दर्जाचे रेनकोट ४०० ते ७०० रुपयांपर्यंत विक्री केले जात आहेत. मागील वर्षी हलक्या दर्जाचे रेनकोट २२० ते ३४० रुपयांपर्यंत तर, चांगल्या दर्जाचे रेनकोट ३८० ते ६६० रुपयांपर्यंत विक्री केले जात होते. तर, लहानमुलांच्या छत्र्यांची विक्री २५० ते ३०० रुपयांपर्यंत केली जात आहे. पुरुष आणि महिलांसाठी देखील छत्र्या आणि रेनकोटमध्ये विविध प्रकार उपलब्ध झाले आहेत. यात जॅकेट, फुलपाखरुच्या आकारासारखे, लांबलचक आणि मिडी सारखे असे विविध प्रकारचे रेनकोट बाजारात विक्रीसाठी उपलब्ध झाले आहेत. प्रत्येक रेनकोटचे दर हे वेगवेगळे आहेत. यात, जॅकेट पद्धतीचा हलक्या दर्जेचा रेनकोट ३०० ते ५०० रुपयांपर्यंत विक्री करण्यात येत आहे. हे रेनकोट मागील वर्षी २५० ते ४५० रुपयापर्यंत विक्री केले जात होते. तर, उत्तम दर्जाचे रेनकोट सध्या ६०० रुपयांपासून ते ९०० रुपयांपर्यंत विक्री केले जात आहेत. गेल्यावर्षी हे रेनकोट ५५० ते ८०० रुपयांपर्यंत विक्री करण्यात येत होते. या रेनकोटचे कापड चांगले असून ते जास्त काळ टिकते, यामुळे हे रेनकोट खरेदी करण्याकडे ग्राहकांचा सर्वाधिक कल असतो.