२० वर्षीय महिला प्रवाशावर बलात्कार केल्याच्या आरोपाखाली आरे पोलिसांनी २४ वर्षीय रिक्षाचालकाला रविवारी अटक केली. हा प्रकार मे महिन्यात घडला होता, परंतु महिलेने नुकतीच तक्रार दाखल करताच पोलिसांनी रिक्षाचालकाला रविवारी उत्तर प्रदेशामधून अटक केली.
पोलिसांनी दिलेल्या माहितीनुसार, तक्रारदार महिला गोरेगाव येथे राहते. सीबीडी – बेलापूर येथून १७ मे रोजी ती रिक्षाने गोरेगाव येथे येत होती. रिक्षा आरे जंगलाजवळ आल्यावर चालकाने लघुशंकेचे निमित्त करून रिक्षा थांबवली. कोणीही नसल्याचे पाहून आरोपीने तरुणीला धाक दाखवून निर्जनस्थळी नेले आणि तिच्यावर बलात्कार केल्याचा आरोप आहे. त्यानंतर आरोपीने तिला मारहाण केली आणि या घटनेबद्दल कोणाला सांगितल्यास ठार मारण्याची धमकी दिली, असे पोलीस अधिकाऱ्यांनी सांगितले.