सीबीडी बेलापूर सेक्टर-१५मधील बंद अवस्थेतील जुनाट व पडक्या इमारतीतील आठव्या मजल्यावरून पडून मृत्युमुखी पडलेल्या १६ वर्षीय मुलीच्या मित्रास पोलिसांनी रविवारी अटक केली. या मृत मुलीच्या कुटुंबीयांनी एनआरआय पोलिसांकडे तक्रार केली होती. या तक्रारीच्या आधारे पोलिसांनी शिवम ननावरे (२०) या तरुणास रविवारी ताब्यात घेतले. त्याच्याविरोधात हत्येचा गुन्हा दाखल करण्यात आला आहे.
ही मुलगी पनवेल येथे राहत होती. गेल्या मंगळवारी ती बेलापूर येथे राहणाऱ्या शिवमकडे आली होती. त्यानंतर ती दोन दिवस त्याच्या घरी राहिली. गुरुवारी दुपारी शिवम व त्याचा मित्र साई कदम (२३) या दोघांनी पार्टी करण्याचा बेत आखला. मात्र आई ओरडेल या कारणाने शिवम, साई कदम व ही मुलगी सीबीडी बेलापूर येथील जुनाट व बऱ्याच वर्षापासून बंद असलेल्या पडक्या इमारतीमध्ये आठव्या मजल्यावर गेले व तेथे पार्टी सुरू केली.
या दरम्यान ही मुलगी त्या इमारतीच्या आठव्या मजल्यावरून डक्टमधून खाली पडली. यात तिचा जागीच मृत्यू झाला. या घटनेनंतर एनआरआय पोलिसांनी अकस्मात मृत्यूची नोंद करून शिवम ननावरे व साई कदम या दोघांची चौकशी सुरू केली होती. मात्र, आमची मुलगी इमारतीवरून पडली नसून तिला शिवमने ढकलून दिल्यामुळे तिचा मृत्यू झाल्याचा आरोप करत मृत तरुणीच्या कुटुंबीयांनी शिवमविरोधात एनआरआय पोलिसांकडे तक्रार दाखल केली. त्यानुसार शिवमविरोधात हत्येचा गुन्हा दाखल करून त्याला अटक करण्यात आल्याची माहिती वरिष्ठ पोलिस निरीक्षक प्रमोद तोरडमल यांनी दिली.