दुचाकीवरून तिघे प्रवास करत असल्यामुळे थांबण्याचा इशारा दिला असता दुचाकी चालकाने वाहतुक पोलिसालाच धडक दिल्याचा प्रकार सांताक्रुझ पूर्व येथे रविवारी रात्री घडला. या अपघातात वाहतुक पोलीस जखमी झाला असून दुचाकी चालकाविरोधात वाकोला पोलिसांनी गुन्हा दाखल केला आहे.
तक्रारदार पोलीस हवालदार विजय चव्हाण(४८) वाकोला वाहतुक शाखेत कार्यरत आहेत. रविवारी रात्री ते सांताक्रुझ पूर्व येथील गेट क्रमांक ८ येथे वाहतुक नियमानासाठी तैनात होते. त्यावेळी परिसरात एका दुचाकीवर तिघेजण प्रवास करत असल्याचे चव्हाण यांना दिसले. दूरूनच पाहिल्यानंतर चव्हाण यांनी त्यांना थांबण्याचा इशारा दिला. पण दुचाकीस्वाराने दुचाकी थांबवण्याऐवजी भरधाव वेगाने चालवण्यास सुरूवात केली. त्यानंतरही चव्हाण यांनी त्याला थांबवण्याचा इशारा दिला. पण दुचाकीस्वाराने थेट चव्हाण यांना धडक दिली. त्यावेळी चव्हाण खाली कोसळले. त्यांना तातडीने व्हीएन देसाई रुग्णालयात नेण्यात आले. तेथे त्यांच्यावर उपचार करण्यात आले. या प्रकरणी सोमवारी पहाटे चव्हाण यांच्या तक्रारीवरून दुचाकी चालकाविरोधात गुन्हा दाखल करण्यात आला आहे. वाकोला पोलीस अधिक तपास करत आहेत.
