कर्नाटकातील विधानसभा निवडणुकीच्या बंदोबस्तासाठी छत्तीसगडवरून छत्तीसगड रिझर्व पोलीस हे कर्नाटक-रायबाग या ठिकाणी बंदोबस्ताला आले होते. ते एकूण पाच जण छत्तीसगड पोलिसांत कार्यरत होते. सुट्टी मिळाल्यामुळे ते सर्व गोव्याला पर्यटनासाठी म्हणून शनिवारी सकाळी गेले होते. यातील मिथिलेश पॅकेरा (वय ३५) या पोलिसाचा दरीत पडून दुर्दैवी मृत्यू झाला.
याबाबत मिळालेल्या माहितीनुसार, सायंकाळी आठ वाजेच्या सुमारास गोव्याहून करून परतत असताना हे सर्व पोलीस लघुशंकेला म्हणून आंबोली घाटातील धबधब्याजवळील एका वळणावर थांबले. त्यातील तिघेजण लघुशंकेसाठी उतरले त्यातील मिथिलेश पॅकेरा हे दरीच्या दिशेने गेले. परंतु तुटलेल्या कठड्याचा अंदाज न आल्याने त्यांचा पाय घसरून ते जवळपास ३०० फूट खोल खाली कोसळले.
रात्रीच्या अंधारात नेमकं काय घडलं? हे त्यांच्यासोबत जे सहकारी पोलीस होते त्यांना सुद्धा कळलं नाही. त्यांनी लागलीच आंबोली पोलीस स्थानकातील दत्तात्रय देसाई यांना संपर्क केला. दत्ता देसाई यांनी आंबोली रेस्क्यू टीम आणि स्वतः घटनास्थळी जात मिथिलेश यांना केवळ ३० मिनिटांत खाली दरीत उतरत वाचवण्याचा प्रयत्न केला. ज्यावेळी रेस्क्यू टीमचे अजित नार्वेकर, मायकल डिसोजा हे खाली पोहोचले, त्यावेळी थोडाफार प्राण त्यांच्यामध्ये शिल्लक असल्याचे त्यांनी सांगितले. परंतु काही काळाने त्यांचा करुण अंत झाला. त्यानंतर आंबोली रेस्क्यू टीम मार्फत त्यांचा मृतदेह वर काढण्यात आला.
याबाबतची माहिती त्याच्या वरिष्ठांना देण्यात आली असून त्यांचे वरिष्ठ कर्नाटक येथून येण्यास तात्काळ रवाना झाले. आंबोली रेस्क्यू टीम मार्फत आणि आंबोली पोलीस स्थानक पोलीस हेड कॉन्स्टेबल दत्ता देसाई, दीपक शिंदे, अभिजीत कांबळे, दीपक नाईक आदी यांनी घटनास्थळी जात तत्परतेने बचाव कार्यास मदत केली. मृतदेह शवविच्छेदनासाठी आंबोली प्राथमिक आरोग्य केंद्रामध्ये पाठवण्यात आला. काल रविवारी मृतदेहाचे शवविच्छेदन करून त्यांचा मृतदेह नातेवाईकांच्या ताब्यात दिला असल्याचं सांगण्यात आलं.