मुंबईत चोरीची एक धक्कादायक घटना समोर आली आहे. व्हीपी रोड इथे दुचाकीवरून आलेल्या दोघांनी ज्वेलरी दुकानाच्या कर्मचाऱ्याला चाकूने धमकावले. इतकंच नाहीतर त्याच्या चेहऱ्यावर मिरची पूड फेकली आणि त्याची ५५ लाख रुपयांची सोन्याची बॅग हिसकावून घेतल्याची घटना घडली आहे. शुक्रवारी सकाळी कर्मचारी आपल्या मालकाच्या दागिन्यांच्या दुकानात सोने पोहोचवण्यासाठी जात होता. यावेळी हा प्रकार घडला.
मिळालेल्या माहितीनुसार, ही बाईक नंतर दक्षिण मुंबईत टाकून दिलेली सापडली. याप्रकरणी व्हीपी रोड पोलीस ठाण्यात चोरीचा गुन्हा दाखल करण्यात आला असून पोलीस पुढील तपास करत असल्याची माहिती आहे. एका अधिकाऱ्याने दिलेल्या माहितीनुसार, “३५ वर्षीय कर्मचाऱ्याने मालकाच्या कार्यालयातून सोने गोळा केले होते आणि ते दागिन्यांच्या दुकानात पोहोचवायला जात होता. सकाळी ७.३० च्या सुमारास ही घटना घडली. तेव्हा तो भुलेश्वरमधील रस्त्यावरून चालला होता. आरोपीने चाकू काढून त्याला धमकावले. त्यातील एकाने त्याच्या अंगावर मिरची पावडर टाकली आणि त्याची बॅग हिसकावून घेतली. सीसीटीव्ही फुटेजमध्ये हा सगळा प्रकार उघड झाला असून दोघे आरोपी दक्षिण मुंबईतील विविध भागात सापडले. नंतर त्यांनी दुचाकी टाकून पळ काढला.”
या गुन्ह्यात चोरीच्या दुचाकीचा वापर झाल्याचा संशय पोलिसांना आहे. पोलिसांनी दुचाकी ताब्यात घेतली असून पोलीस त्याचा पुढील तपास करत असल्याची माहिती आहे. दरम्यान, हा कर्मचारी पाच वर्षांपासून ज्वेलर्सकडे काम करत असल्याचे पोलिसांनी सांगितले. या प्रकरणाचा छडा लावण्याचा प्रयत्न सुरू असल्याचे पोलिसांनी सांगितले.