मराठी माणसाला इमारतीमधील घराची विक्री करण्यास नकार देणे दोघांना महागात पडले आहे. नया नगर पोलिस ठाण्यात या दोघांविरोधात समाजात तेढ निर्माण केल्याप्रकरणी गुन्हा दाखल करण्यात आला आहे.
मिरा रोडच्या शांती नगर सेक्टर-३मधील एका चार मजली इमारतीमधील घर विक्री करण्यासाठी फेसबुकवर एका इसमाने जाहिरात केली होती. त्यानुसार घर खरेदीसाठी मराठी एकीकरण समितीचे गोवर्धन देशमुख यांनी जाहिरातीत दिलेल्या मोबाइल क्रमांकावर संपर्क साधला. यावेळी संबंधित इसमाने तुम्ही मराठी असल्याचे सांगत सोसायटीच्या नियमानुसार घर विक्री करता येणार नाही, असे उत्तर दिले. या प्रकरणाची तक्रार देशमुख यांनी मिरा रोडच्या नया नगर पोलिस ठाण्यात केली होती. त्यानुसार नया नगर पोलिसांनी रिंकू देढिया व राहुल देढिया यांच्याविरोधात कलम १५३अ नुसार गुन्हा दाखल केला आहे.