मुंबईतील विविध विभागांतील पाच फूटपाथच्या दुरुस्ती, सौंदर्यीकरणासाठी पालिकेकडून ५१ कोटी रुपये खर्च केले जाणार आहेत. पालिकेच्या बुधवारच्या स्थायी समिती बैठकीत पाच फूटपाथसाठी ५१ कोटी खर्च करण्याच्या प्रस्तावास मंजुरी मिळाली आहे. हा खर्च अवाजवी, उधळपट्टी करणारा असल्याचा आरोप भाजपने केला आहे. पाच फूटपाथसाठी ५१ कोटी रुपये खर्च केले जात असताना संपूर्ण मुंबईतील अन्य फूटपाथकडे दुर्लक्ष होत असल्याकडे भाजपने लक्ष वेधले आहे.
पालिकेने गोरेगावमधील एम. जी. मार्गालगतचे पट्टे – फूटपाथ ,वांद्रे पूर्वेतील आर. के. पी. व संत ज्ञानेश्वर मंदिर रस्त्यालगत पट्टे – फूटपाथसाठी १९ कोटी रुपये खर्च करण्यात येणार आहेत. चेंबूर व माटुंगा येथील फूटपाथ सुशोभिकरणासाठी ३२ कोटी रुपयांचा खर्च केला जाणार आहे. एकीकडे करोनामुळे विविध विकासकामांना कात्री लावली जात आहे. करोनाने निर्माण झालेल्या आर्थिक स्थितीमुळे पालिकेने रस्ते, उद्याने, पर्जन्य जलवाहिन्यांच्या विकासकामांमध्ये कपात केली आहे. त्याचवेळी, ठराविक भागांत फूटपाथवरील सुधारणा, सुशोभिकरणासाठी कोट्यवधी रुपयांची उधळपट्टी कशासाठी केली जात आहे, असा सवाल भाजपने उपस्थित केला आहे. याप्रकारची कामे संपूर्ण मुंबईत होणार का, असाही प्रश्न पालिकेतील भाजपचे गटनेते प्रभाकर शिंदे यांनी उपस्थित केला आहे.
मुंबईतील फूटपाथ सुधारणा आणि सुशोभिकरणासाठी मुंबई उपनगराचे पालकमंत्री आदित्य ठाकरे यांना बैठक घ्यावी लागते. त्यानंतर पुन्हा आढावा बैठक घ्यावी लागते. पालकमंत्र्यांनी आढावा बैठकीत निर्देश दिले असून हे काम पालिका आयुक्तांकडून केले जात आहे की राज्य सरकारकडून असाही प्रश्न उपस्थित होतो. हे रस्ते मुख्य किंवा हम रस्ते नसून यापूर्वी मुंबईतील अनेक फूटपाथची कंपन्यांच्या सामाजिक निधीतून झाली आहेत. तेव्हा या कामांसाठी पालिकेच्या निधीऐवजी या निधीतून कामे झाली नसती, याकडेही प्रभाकर शिंदे यांनी लक्ष वधले आहे.