पीएमपी बसने प्रवास करणाऱ्या महिलेच्या पर्समधील दहा हजार रुपये रोख आणि दागिने चोरीला गेल्याची घटना समोर आली आहे. मनीषा भाऊसाहेब खरात (वय ३०, रा. रायगड) यांनी या प्रकरणी फिर्याद दिली आहे. पोलिसांनी अज्ञात महिलेविरोधात चोरीचा गुन्हा दाखल केला आहे. पोलिसांनी दिलेल्या माहितीनुसार, ‘फिर्यादी महिला सोमवारी दुपारी पीएमपी बसने पुणे स्टेशनवरून रामवाडीकडे जात होत्या. बसमधून प्रवास करताना त्यांच्या शेजारील सीटवर एक महिला बसली होती. प्रवासादरम्यान त्या महिलेने हातचलाखीने खरात यांच्या पर्समधील दहा हजार रुपये रोख आणि एक लाख रुपयाचे सोन्याचे दागिने काढून घेतले. रामवाडी जकात नाका येथे फिर्यादी उतरून घरी जात असताना त्यांना पर्सची चैन उघडी दिसली. पाहणी केली असता दागिने आणि रोख रक्कम नसल्याचे दिसून आले. तातडीने रामवाडी पोलिस चौकीत घटनेची माहिती दिली. पुढील तपास पोलिस उपनिरीक्षक विशाल पाटील करीत आहे.