जिल्ह्यात अजूनही मागणीच्या प्रमाणात खूपच कमी संख्येने रेमडेसिव्हिर इंजेक्शन प्राप्त होत असल्याने रुग्ण आणि त्यांच्या नातेवाईकांची धाकधूक कायम आहे. सोमवारी प्राप्त झालेल्या दोन हजार इंजेक्शन्सचे ‘प्रथम मागणी प्रथम प्राधान्य’ याप्रमाणे रुग्णालयांना वितरण करण्यात आल्याची माहिती प्रशासनातील सूत्रांनी दिली.
करोनाबाधित रुग्णांवरील उपचारात रेमडेसिव्हिर इंजेक्शनचा प्राधान्याने वापर होतो आहे. मात्र, रुग्णसंख्या मोठ्या प्रमाणावर वाढू लागल्याने रेमडेसिव्हिर इंजेक्शनची मागणीही वाढू लागली आहे. तेवढ्या प्रमाणात पुरवठा होत नसल्याने रुग्ण आणि त्यांचे नातेवाईक यांच्यातील अस्वस्थता वाढत चालली आहे. सोमवारी जिल्ह्यात दोन हजार इंजेक्शन्स प्राप्त झाले. अनेक रुग्णालयांनी जिल्हा प्रशासनाकडे मागणी नोंदविली होती. प्रथम मागणी प्रथम प्राधान्य या न्यायाने रुग्णालयांना इंजेक्शनचा पुरवठा करण्यात आल्याची माहिती प्रशासनातील सूत्रांनी दिली