शहरातील करोनाचा वाढता प्रादुर्भाव रोखण्यासाठी नवी मुंबई महानगरपालिकेतर्फे विविध उपाययोजना केल्या जात आहेत. त्या अंतर्गत दर आठवड्याच्या अखेरीस मॉलमध्ये नागरिकांची होणारी गर्दी पाहता मॉलमध्ये प्रवेश करणाऱ्यांची अँटिजेन तपासणी करून आणि अहवाल निगेटिव्ह आला तरच त्या व्यक्तींना मॉलमध्ये प्रवेश देण्याच्या सूचना सर्वच मॉल व्यवस्थापनास देण्यात आल्या आहेत. त्यानुसार २६ मार्चपासून या आदेशाच्या अंमलबजावणीला सुरुवात करण्यात आली आहे. या आदेशाचे उल्लंघन करणाऱ्या ग्रँड सेंट्रल आणि इन ऑर्बिट मॉलकडून प्रत्येकी ५० हजार रुपयांचा दंड वसूल करण्यात आला आहे.
सुट्टीच्या दिवशी शहरातील मॉलमध्ये गर्दी होते. यातील अनेक जण करोनासंबंधी सुरक्षा नियम पाळत नसल्याचे दिसून आले आहे. यावर उपाय म्हणून शुक्रवारी ४ वाजल्यापासून शनिवार व रविवार पूर्ण दिवस मॉलच्या प्रवेशव्दाराजवळ पालिकेतर्फे नागरिकांची अँटिजेन चाचणी होऊ लागली आहे. त्यामध्ये करोना चाचणी अहवाल निगेटिव्ह असेल किंवा मागील ७२ तासांमधील निगेटिव्ह कोव्हिड चाचणी अहवाल सादर केला तरच त्यांना मॉलमध्ये प्रवेश देण्यात येत आहे.
या उपाययोजनांचा आढावा घेण्यासाठी पालिका आयुक्त अभिजित बांगर स्वतः सीवूड नेरुळ येथील ग्रँड सेंट्रल मॉल तसेच, वाशी येथील इनॉर्बिट मॉलमध्ये अचानक गेले असता तेथे अँटिजेन चाचण्यांशिवाय अथवा अहवालाची विचारणा केल्याशिवाय नागरिकांना प्रवेश दिला जात असल्याचे आढळून आले. याबाबत त्यांनी दक्षता पथकाकडे विचारणा केली आणि त्यांना कारवाई करण्याचे आदेशही दिले.
…तर कठोर कारवाई
विशेष दक्षता पथकांनी तातडीने कार्यवाही करीत या दोन्ही मॉलच्या व्यवस्थापनांकडून प्रत्येकी ५० हजार रुपये दंड वसूल केला. यापुढे नियमांचे उल्लंघन केल्यास आणखी कठोर कारवाई करण्यात येईल, अशी तंबीही त्यांना देण्यात आली.