सीबीडी बेलापूर येथील न्यायालयात बनावट नावाने व बनावट कागदपत्रांच्या सहाय्याने आरोपीला जामीन देण्याच्या प्रयत्नात असलेल्या व्यक्तीला स्वत: न्यायाधीशांनीच पकडल्याची घटना घडली आहे. मलंग मोहम्मद शेख (४५) असे या व्यक्तीचे नाव असून सीबीडी पोलिसांनी त्याच्यावर फसवणुकीसह बनावट कागदपत्रे तयार केल्याप्रकरणी गुन्हा दाखल करून त्याला अटक केली आहे. या आरोपीने यापूर्वीदेखील वेगवेगळ्या बनावट नावांनी काही आरोपींना जामीन देऊन न्यायालयाची फसवणूक केल्याचे उघडकीस आले आहे. त्यामुळे सीबीडी येथील न्यायालयात बोगस जामीनदार आणि बनावट कागदपत्रांच्या माध्यमातून आरोपींना जामीन मिळवून देणारी टोळी पुन्हा सक्रिय झाल्याची चर्चा आहे.
हा जामीनदार यापूर्वीही न्यायालयात जामीन देण्यासाठी हजर राहिला असल्याचा न्या. कोळपकर यांना संशय आला. त्यामुळे त्यांनी न्यायालयातील जामीनदारांचे रजिस्टर तपासण्यास सांगितले असता हा आरोपी यापूर्वी ४ आरोपींना वेगवगेगळ्या नावाने जामीन राहिल्याचे आढळून आले. त्यानंतर न्या. कोळपकर यांनी या आरोपीविरोधात कारवाई करण्याचे आदेश दिले. पोलिसांनी त्याची चौकशी केली असता त्याचे खरे नाव मलंग मोहम्मद शेख असल्याचे व तो कल्याण पश्चिम येथील भोइवाडी परिसरात राहात असल्याचे आढळून आले.
साथीदारांचा शोध
शेख याने यापूर्वी महेंद्रलाल कन्डी, मोहम्मद अब्दुल शेख, सलिम मोहम्मद अन्सारी आणि अब्दुल सलिम शेख अशी बनावट नावे व त्या नावाने तयार करण्यात आलेल्या बनावट कागदपत्रांच्या माध्यमातून सीबीडी येथील न्यायालयात जामीन दिल्याचे आढळून आले. त्यामुळे त्याने बनावट कागदपत्रे कुठून व कुणाकडून करून घेतली. तसेच यात इतर कुणाचा सहभाग आहे का, याचा पोलिसांकडून तपास करण्यात येत आहे.
यापूर्वीही कारवाई
नवी मुंबई पोलिसांच्या गुन्हे शाखेने जुलै २०१७ मध्ये बनावट कागदपत्रे तसेच, बनावट जामीनदार तयार करून त्याद्वारे आरोपींना जामीन मिळवून देऊन न्यायालयाची फसवणूक करणाऱ्या ६ जणांच्या टोळीला अटक केली होती. त्यावेळी गुन्हे शाखेने या टोळीकडून बनावट आधार कार्ड, शिधावाटप पत्रिका, मतदान ओळखपत्र, कर पावत्या, बनावट शासकीय कार्यालयांचे रबरी शिक्के असलेले शिधावाटप पत्रिकेचे कोरे छापील कागद आदी बनावट सरकारी कागदपत्रे हस्तगत केली होती. या टोळीने अनेक न्यायालयीन प्रकरणांमध्ये बोगस जामीनदार उभे करून तसेच, बनावट कागदत्रांच्या आधारे अनेक आरोपींना जामीन मिळवून दिल्याचे उघडकीस आले होते.