हडपसर परिसरात तरुणाने चुलत मामाच्या मुलीला प्रेमाच्या जाळ्यात अडकवून तिला भेटण्यासाठी आणि बोलण्यासाठी त्रास दिला. या त्रासाला कंटाळून तरुणीने राहत्या घरात गळफास घेऊन आत्महत्या केल्याची घटना समोर आली आहे. या प्रकरणी हडपसर पोलिस ठाण्यात तरुणाच्या विरोधात आत्महत्येला प्रवृत्त केल्याचा गुन्हा दाखल करण्यात आला.
ज्योती कैलास जगताप (वय १८) असे आत्महत्या केलेल्या तरुणीचे नाव आहे. या प्रकरणी किरण भाऊ शिंदे (रा. वैदवाडी, हडपसर) याच्याविरुद्ध गुन्हा दाखल करण्यात आला. मुलीचा भाऊ अक्षय जगताप यांनी या प्रकरणी तक्रार दिली. ज्योती आणि किरण एकाच परिसरात राहायला होते. त्यानंतर किरणने ज्योतीला प्रेमात अडकवून तिला भेटण्यासाठी आणि बोलण्यासाठी त्रास दिला. या त्रासाला कंटाळून ज्योतीने आत्महत्या केली. या प्रकरणी हडपसर पोलिस तपास करीत आहेत.